Մեծ Բրիտանիայի թագուհի Եղիսաբեթ II-ը որոշել է հրաժարվել բնական մորթուց պատրաստված հագուստից 2019 թ.-ից, հայտնում է Daily Mail-ը՝ հղում անելով թագուհու նորաձևության դիզայներ Անջելա Քելիի հուշերին:
Իր «Մետաղադրամի մյուս կողմը. թագուհի, նորաձևության դիզայներ և զգեստապահարան» գրքում, որի հրատարակությունը հավանության է արժանացել անձամբ Եղիսաբեթ II-ի կողմից, Քելին գրել է, որ 2019 թ.-ից, հատկապես ցուրտ եղանակին, թագուհին միջոցառումներին մասնակցելու է արհեստական մորթուց հագուստով:
Բուքինգհեմյան պալատը հաստատել է տեղեկությունը՝ հայտարարելով, որ թագուհու նոր հանդերձանքներում կօգտագործվի բացառապես արհեստական մորթի:
Նախկինում Եղիսաբեթ II-ը քննադատվում էր էկո-ակտիվիստների կողմից բնական մորթուց մուշտակներ և թիկնոցներ կրելու համար: