Լուրեր
Նորմալ է, որ բողոքներ կան, բարեփոխումների ծավալը մեծ է. Արայիկ Հարությունյան
  • 22:00
  • 2019-11-05
  • Դիտումներ՝ *

Կրթության, գիտության, մշակույթի և սպորտի նախարար Արայիկ Հարությունյանն «Առաջին լրատվական»-ի հետ զրույցում անդրադառնալով իր անվան շուրջ ձևավորված աղմուկին՝ նշեց, որ այն գործընթացները, որոնք տեղի են ունեում և որոշակի դժգոհության առիթ են դառնում մի բանի պատճառով են. «Բարեփոխումները, որոք տեղի են ունենում ՀՀ կրթության, գիտության և մշակույթի ոլորոտում, մասշտաբային են, հայեցակարգային են, և բնական է, որ հին իներցիաներին վնաս են, որոշակի խմբերի շահերն են բախվում, կան որոշակի կարծրատիպեր: Ես դա նորմալ գործընթաց եմ համարում, պետք է համբերատար խոսելով, եթերներում բացատրելով՝ հասնենք այն նպատակին, որը դրված է»:

Հարցին՝ սկանդալը հաջողության նշա՞ն եք համարում, նախարարը պատասխանեց, որ սկանդալը կապված է ընկալումների հետ: «Ստանդարտ միջոցառում չի եղել, գուցե դա է պատճառը: Նախ՝ մենք պետք է հասկանանք, թե որքանով է այդ միջոցառումը համապատասխանել այն ծրագրին, որը ներկայացվել է ԿԳՄՍ նախարարի կողմից ձևավորված հանձնաժողովին: Ըստ ներկայացված ծրագրի՝ պետք է ներկայացվեին 1920-ականների հայ հեղինակների գործերը բեմականացման միջոցով»:

Անդրադառնալով դիտարկմանը, որ իրականում «Հուզանք և Զանգ»-ը ռադիկալ արվեստի ներկայացում էր, այն էլ հանրային վայրում, նախարարը նշեց. «Այդ աղմուկից հետո ասել եմ, որ դրան պետք է արվեստագետները գնահատական տան, որովհետև արվեստը բավականին բարդ երևույթ է: Ես այսօր մտածում էի՝ ինչպիսի հարձակումների կենթարկվեր Փարաջանովը, եթե մեր ժամանակակիցը լիներ, որովհետև այն, ինչ անում էր, նույնպես արտառոց էր: Ցանկացած նորը գուցե շատերին դուր չգա, բայց արգելքներ այս առումով չեն կարող լինել: 100, 200, 250 միջոցառումներից, որոնք  մենք կազմակերպում ենք և դրամաշնորհներ ենք տալիս, մեկ-երկուսը, նույնիսկ կեսը, կարող են չստացված լինել: Արվեստագետները կարող են ասել, որ եթե նունիսկ 100-ից 2-ը հաջողված լինեն, մեծ արդյունք է, իսկ մենք ունենք հաջողված բազմաթիվ միջոցառումներ: Նույնիսկ եթե բոլորով հավաքվենք և ասենք, որ սա շատ վատ միջոցառում էր, սա արվեստի ոլորտում նորմալ գործընթաց է, պետք է թեթև տանել:

Խնդիրն այն է, որ որոշակի խմբերի կողմից շահարկումներ եղան, ներկայացվեց որպես սատանիստական, ԼԳՏԲ քարոզի, Ստամբուլյան կոնվենցիայի դեմ միջոցառում, սակայն ամենևին այդպես չէր, պարզապես գուցե որոշակի ճաշակի համապատասխան չէր»,- նշեց նախարարը՝ հավելելով, որ մասնագետների կարծիքը նախարարության և մշակույթի համապատասխան հանձնաժողովի կողմից հաշվի կառնվի:

Հարցին, թե արդյոք ֆինանսական աջակցություն կտրամադրվեր, եթե նախապես ակնկալվեր, որ այսպիսի արձագանք կլինի, Ա. Հարությունյանը նշեց. «Չեմ պատրաստվում ինքս որոշումներ կայացնել այն հարցերի վերաբերյալ, որոնց վերաբերյալ որոշումներ պետք է կայացնեն գեղագիտական խորհուրդներն ու հանձնաժողովները»:

 

Մանրամասն՝ տեսանյութում:

  • Դիտումներ՝ *