Հայկական ֆուտբոլի շուրջ նեգատիվ իրադարձությունները զարգացման նոր թափ են ստացել: Այսօր տեղեկացրել էինք, որ ՀՖՖ-ի նախագահ Արթուր Վանեցյանը պատրաստվում է Հայաստանի ազգային հավաքականի գլխավոր մարզիչ նշանակել Ալեքսանդր Գրիգորյանին: Իսկ ո՞վ Ալեքսանդր Գրիգորյանը: Վերջինս Ռուսաստանում հայտնի է կանանց ֆուտբոլային ակումբներում աշխատելով, քանզի տղամարդկանց թիմերում որևէ լուրջ արդյունք չի գրանցել: Ալեքսանդր Գրիգորյանի վերջին ակումբը եղել է «Տամբովը», որի գլխավոր մարզչի պաշտոնից հրաժարական է տվել ՌՖՊԼ-ի 13-րդ տուրում «Ուրալից» կրած պարտությունից հետո: 2018-2019 թվականներին Գրիգորյանը գլխավորել է Մոսկվայի ԲԿՄԱ-ի կանանց թիմը:
2018 թվականին Գրիգորյանը եղել է Վլադիվոստոկի «Լուչ-Էներգիայի», իսկ դրանից առաջ Ռուսաստանի երրորդ դիվիզիոնում հանդես եկող Մոսկվայի «Արարատի» գլխավոր մարզիչը: 24 տարվա մարզչական կարիերայի ընթացքում Գրիգորյանն աշխատել է 21 թիմերում, ինչը, կարծում ենք, բավական խոսուն փաստ է նրա ոչ այնքան լուրջ պրոֆեսիոնալ որակների մասին: Միայն 2015 թվականին Գրիգորյանը 3 ակումբ է փոխել՝ Վելիկի Նովգորոդի «Տոսնո», Տաշքենդի «Պախտակոր» և Խաբարովսկի ԲՄԱ: Նման մակարդակի թիմերը, որտեղ աշխատել է Գրիգորյանը, կարելի է շարունակ թվարկել: Նշենք նաև, որ Ալեքսանդր Գրիգորյանը Ռուսաստանում հայտնի է տարաբնույթ սկանդալների մեջ ներքաշվելով: Օրինակ՝ լինելով «Արարատի» գլխավոր մարզիչ, նա միջնամատ էր ցույց տվել մրցակից թիմի երկրպագուներին: Իսկ ո՞վ է այս մարզչին վստահում Հայաստանի ազգային հավաքականը:
«Առաջին լրատվական»-ի հավաստի տեղեկությունների համաձայն՝ ՀՖՖ-ում կտրականապես դեմ են Գրիգորյանի թեկնածությանը: ՀՖՖ-ի տեխնիկական տնօրենը՝ իսպանացի հանրահայտ մասնագետ Խինես Մելենդեսը, որը հավաքական թիմերի համակարգողն է ազգային թիմի ղեկին, ցանկություն է հայտնել տեսնել եվրոպացի մասնագետի, որի աշխատելու ոճը մոտ է իսպանական մոդելին: Մեր տեղեկություններով՝ Գրիգորյանի թեկնածությանը դեմ են արտահայտվել նաև ՀՖՖ-ի մյուս մասնագետները: Ավելին, Ռուսաստանում հանդես եկող Հայաստանի ազգային թիմի առաջատարներից մի քանիսը Գրիգորյանի գլխավոր մարզիչ նշանակվելու պարագայում այլևս չեն կրի հավաքականի մարզաշապիկը: Եվ այսպես, Ալեքսանդր Գրիգորյանին, առանց ՀՖՖ-ի մասնագետների կարծիքը հաշվի առնելու, ազգային հավաքականի գլխավոր մարզիչ է նշանակում Արթուր Վանեցյանը: Վերջինս նույնիսկ հարկ չի համարել իր գործընկերների հետ քննարկել այս թեկնածությունը:
Վանեցյանը Գրիգորյանի թեկնածության համաձայնության է եկել «Ուրարտու» ակումբի սեփականատեր Ջևան Չելոյանցի և վերջերս սկանդալների մեջ ներքաշված «Լոռի» ակումբի սեփականատեր Թովմաս Գրիգորյանի հորդորով: Ավելի ստույգ, Չելոյանցը պատրաստակամություն է հայտնել իր գրպանից վճարել Գրիգորյանի աշխատավարձը: Ի դեպ, Չելոյանցը հայտնի է Մոսկվայի «Սպարտակի» ղեկավար կազմում իր «փայլուն» գործունեությամբ: Մամուլի ասուլիսներից մեկի ընթացքում նա հայտարարել էր, որ ինքն է աշխատանքից ազատել «Սպարտակի» իսպանացի հայտնի գլխավոր մարզիչ Ունայ Էմերիին, որն այնուհետև «Սևիլիայի» հետ նվաճել էր Եվրոպա լիգայի գավաթը: Փաստորեն, այդ քայլը Չելոյանցը համարում է կառուցողական և նույնիսկ «գլուխ գովում»: Ու հիմա հերթը հասել է Հայաստանի ազգային հավաքականին: Ինչ իմաստ ուներ Իսպանիայից հրավիրել հանրահայտ մասնագետներին, երբ Չելոյանցը, Վանեցյանի և Թովմաս Գրիգորյանի հետ պետք է ազգային հավաքականը վստահեին կանանց մասնագետի: Ստեղծված իրավիճակն իրականում դժվար է մեկնաբանել: Պարզ է մի բան: Հայկական ֆուտբոլը գտնվում է ավելի քան վտանգավոր իրավիճակում և պահանջում է լուրջ միջամտություն:
ՀՀ վարչապետ Նիկոլ Փաշինյանը վերջերս Հայաստանի ազգային հավաքականը որակեց պետական նշանակության գործոն: Ու հիմա պետական նշանակության թիմը կարծես թե դարձել է վանեցյանների և չելոյանցների խաղալիքը: Սա այն դեպքն է, երբ հասարակությունը և, մասնավորապես ֆուտբոլին մոտ կանգնած մարդիկ, չպետք է թույլ տան, որպեսզի տեղի ունենա խայտառակ նշանակումը: Նոյեմբերի 15-ին Հայաստանի հավաքականը մրցելու է Հունաստանի հետ: Այո, հիմա չունենք գլխավոր մարզիչ, սակայն ընտրական այս շրջափուլը մեզ համար արդեն իսկ ավարտված է, և առաջիկա հանդիպումները կարելի վստահել ազգային թիմի մարզչական շտաբում եղած մասնագետներին: Մինչ մյուս ընտրական փուլի մեկնարկը կա բավարար ժամանակ՝ նորմալ մասնագետ գտնելու: Վանեցյանի ձեռքով հայկական ֆուտբոլը մոտ է ռուսաֆիկացման, ընդ որում՝ անմակարդակ ռուսաֆիկացման։