Թուրքիայի նախագահ Թայիփ Էրդողանը չի բացառել Ռուսաստանից կործանիչների ձեռքբերման հնարավորությունը, եթե Միացյալ Նահանգները հրաժարվի F-35-ի մատակարարումից: Այդ մասին նա նոյեմբերի 5-ին հայտնել է լրագրողներին՝ գրում է TASS-ը:
«Երբ մենք գնում էինք C-400 զենիթահրթիռային համակարգերը, մենք ոչ ոքից թույլտվություն չէինք հարցնում, եթե մենք համապատասխան որոշում ընդունենք, ապա մենք կգնենք դրանք»,-նշել է Թուրքիայի ղեկավարը՝ ի պատասխան Մոսկվայի հետ ռուսական կործանիչների մատակարարման պայմանագրի կնքման հնարավորության վերաբերյալ լրագրողի հարցի:
«Եթե F-35-ի հարցը չլուծվի, ապա մենք անհրաժեշտ քայլեր կձեռնարկենք»,-հավելել է Էրդողանը: Թուրքիայի պաշտպանական արդյունաբերության քարտուղարության ղեկավար Իսմայիլ Դեմիրը նոյեմբերի 4-ին հայտնել է, որ երկրի իշխանություններն ուսումնասիրում են ռուսական կործանիչների մատակարարման վերաբերյալ Ռուսաստանի առաջարկը: «Մենք ունենք ռուսական կողմի առաջարկությունը, եւ մենք այդ առաջարկությունը գնահատում ենք: Այն անհրաժեշտ է գնահատել ֆինանսական, տեխնիկական և ռազմավարական տեսակետներից: Այժմ խոսքը չի վերաբերում առաջարկությանը պատասխան տալուն: Անհրաժեշտ է կատարել ընդգրկուն վերլուծություն»,-ասել է Դեմիրը NTV հեռուստաալիքի եթերում:
Հոկտեմբերի 25-ին Daily Sabah թուրքական թերթը հայտնել էր, որ Անկարան և Մոսկվան մոտ են 36 Սու-35 կործանիչների մատակարարման վերաբերյալ համաձայնագրի կնքմանը:
