Հեղինակավոր Forbes-ի զբոսաշրջային ուղևորությունների բաժնում Երևանի մասին հրապարակված հոդվածում մեր մայրաքաղաքը որպես «ճանապարհորդության զարդ» է ներկայացվում:
Հոդվածագիրը Երևանը բնութագրում է որպես գրավիչ ճարտարապետությամբ և հարուստ պատմությամբ ընդհանուր առմամբ ապահով և կենսուրախ քաղաք: «Վարդագույն քաղաք» անունը կրող Երևանում քայլելիս շատ հետաքրքրություններ կարելի է գտնել»,- նկատում է նա:
Նյութի հեղինակը խորհուրդ է տալիս զբոսանքը սկսել 1980-ին կառուցված Կասկադ համալիրից, որը միացնում է քաղաքի երկու մասերը և ներկայանում է որպես արվեստների կենտրոն: Հեղինակի երթուղին անցնում է Օպերայի տարածքով և հասնում Հանրապետության Հրապարակ, որտեղ խորհուրդ է տալիս անպայման տեսնել «Երգող շատրվանները»:
Անդրադառնալով հայկական խոհանոցին, հեղինակը խորհուրդ է տալիս համտեսել ղափամա, լահմաջո, որն անվանում է «հայկական պիցցա», խորոված և գաթա:
Ռեստորաններից նա առանձնացրել է «Դոլմաման», որը հայտնի է դարձել բազմաթիվ ճանաչված արտասահմանցի հյուրերով, որոնց թվում են Բորիս Ելցինը, Հիլարի Քլինթոնը, Ժերար Դեպարդիեն, Մայքլ Քեյնը, Ջորջ Քլունին, Ուելսի արքայազնը, Քանյե Ուեսթը, Խուլիո Իգլեսիասը:
Երևանյան փառատոներից հոդվածի հեղինակը կարևորել է «գինու օրեր» փառատոնը, որն այս տարի անցկացվել էր Սարյան փողոցի շրջակայքում: Նա հիշատակել է նաև Ախթալայում անցկացվող խորովածի փառատոնը:
Հոդվածագիրը նաև նշել է, որ դեպի Երևան ուղիղ չվերթներ կան 20 երկրներից, այդ թվում՝ Փարիզից:
