Թույների նկատմամբ իմունիտետ ունեցող հսկա առնետների ներխուժումը սպառնում է բրիտանական քաղաքներին՝ գրում է The Mirror-ը: Վերջերս Լիվերպուլում բռնել ու լուսանկարել էին մոտ 60 սմ երկարությամբ առնետ: Փորձագետների կարծիքով՝ դա կրծող մուտանտների տեսքով ընդլայնվող աղետի օրինակ է:
Ինչպես նշում է թերթը, շատ քաղաքապետարաններ բրիտանական կառավարությունից պահանջում են թույլատրել ավելի ուժեղ քիմիկատներ օգտագործել հսկա առնետների հաղթարշավի դեմ պայքարի համար:
«Զարմանալի ոչինչ չկա, երբ նման մեծ առնետներ ես տեսնում գյուղական վայրերում, սակայն քաղաքներում դա եղել է բավականին հազվագյուտ երևույթ: Ակնհայտորեն, ինչ-որ բան է տեղի ունենում: Կարծում եմ՝ նրանք կարող են էվոլյուցիայի ենթարկվել թույների նկատմամբ իմունիտետի պատճառով»,- ասել է վնասատուների դեմ պայքարի հարցերով լիվերպուլցի մասնագետ Շոն Ուիլենը: Նրա խոսքով՝ նման կրծողների թվաքանակի աճ է նկատվում Բիրմինգհեմում, Լոնդոնում և այլ քաղաքներում:
Պարբերականն ուշադրություն է դարձնում նաև այն հանգամանքին, որ հսկա կրծողներին առնչվող խնդիր է առկա ոչ միայն Մեծ Բրիտանիայում. վերջերս խոշոր առնետներ են բռնվել Ստոկհոլմում և Դուբլինում:
