«Վերին Լարսը իրականում փակվել է եղանակի պատճառով»,- «Առաջին լրատվական»-ի հետ զրույցում վստահեցրեց ԱԺ «Իմ քայլը» խմբակցության պատգամավոր Արմեն Փամբուխչյանը՝ տեղեկացնելով, որ ԱԺ իրենց հանձնաժողովը Վլադիկավկազում հանդիպում է ունեցել ՌԴ Պետդումայի իրենց գործընկերների, ինչպես նաև ՌԴ հյուսիսային տարածաշրջանի մաքսային ծառայությունների ղեկավարների հետ և քննարկել Լարսի հարցը:
Պատգամավորը հավելեց՝ իրենց վստահեցրել են, որ ընդհանրապես «փակ հասկացողությունը միմիայն կապված է եղանակային պատճառների և ճանապարհի փաստացի անանցանելիության հետ»:
Արմեն Փամբուխչյանի համոզմամբ՝ այս առումով որևէ քաղաքական հարց չկա. «Անցակետի աշխարհագրական դիրքը վկայում է, որ այնտեղ կարող են լինել խցանումներ: Եվ ընդհանրապես, իրենց հավաստիացմամբ՝ իրենք Հայաստանի բեռնափոխադրողներին հատուկ ուշադրություն են դարձնում՝ հնարավորինս օգնելով»:
«Էքսպորտ Արմենիա» փորձագետների ասոցիացիայի համահիմնադիր Էմիլ Ստեփանյանը, սակայն, նշեց, որ ռուս մաքսայինների և հայ փոխադրողների միջև ինչ-ինչ գործարքներ տեղի են ունենում. «Դա կապված է շատ բաների հետ, միգուցե նաև մեր բեռնափոխադրողների՝ օրենքներից անտեղյակության, ինչպես նաև կոռուպցիայի նկատմամբ մերոնց պատրաստակամության հետ: Իրավիճակը նման է 90-ականներին Հայաստանում տեղի ունեցած իրավիճակին, երբ վարորդների մեծ մասը օրենք չգիտեր և բարևի փոխարեն գերադասում էր մի փոքր գումար տալ պետավտոտեսուչին՝ ո՛չ պնդելով իր իրավունքները, ո՛չ իմանալով իր պարտականությունները»:
Էմիլ Ստեփանյանը ևս քաղաքական խնդիր այստեղ չի տեսնում: «Սակայն Վերին Լարսի հարցը մենք հիմնովին չենք կարողանում լուծել, իսկ այդ խնդիրները և՛ օբյեկտիվ են, և՛ սուբյեկտիվ»,- հավելեց նա:
Հարցազրույցն ամբողջությամբ՝ տեսանյութում: