Ֆուտբոլի Հայաստանի ազգային հավաքականի և Երևանի «Փյունիկի» կիսապաշտպան Էրիկ Վարդանյանը կարիերան կշարունակի Ռուսաստանի Պրեմիեր լիգայում: Ըստ մամուլում շրջանառվող տեղեկության՝ մեր ֆուտբոլիստը 3.5 տարվա պայմանագիր է կնքել «Սոչիի» հետ: Տրանսֆերի մասին տեղեկությունը երեկ հաստատել էր նաև «Փյունիկ» ակումբի նախագահ Արթուր Սողոմոնյանը: Հիշեցնենք, որ «Սոչիում» է հանդես գալիս նաև Հայաստանի ազգային հավաքականի հարձակվող Ալեքսանդր Կարապետյանը: Մեր ազգային թիմի դարպասապահների մարզիչ Ռոման Բերեզովսկին էլ այս թիմի մարզչական շտաբում է:
Օրեր առաջ ՀՖՖ կարգապահական կոմիտեն որոշում էր կայացրել Վարդանյանին 6 ամսով որակազրկելու վերաբերյալ: Հայաստանի Բարձրագույն խմբի առաջնության Երևանի «Արարատի» դեմ մրցավեճում Վարդանյանը հարվածել էր մրցակցի խաղացողին, հրել մրցավարին և միջնամատ ժեստ ցույց տվել «Արարատի» երկրպագուներին: Ու փաստորեն Վարդանյանը մեր ներքին առաջնությունում հնարավորություն կունենար խաղադաշտում հայտնվելու միայն 2020 թվականի ապրիլին: Իսկ ֆուտբոլիտի համար կես տարի չխաղալը կարող է լուրջ հետևանքներ թողնել նրա կարիերայի վրա: Նշենք, որ Վարդանյանը 21 տարեկան է և Հայաստանի ամենատաղանդավոր ֆուտբոլիստներից մեկն է, եթե ոչ՝ ամենատաղանդավորը:
Վերջին տարիներին Վարդանյանը հայտնվել էր մի շարք բարձրակարգ ակումբների ուշադրության կենտրոնում: Անցյալ տարվա ամռանը Վարդանյանը փորձաշրջան էր անցել Իսպանիայի Լա լիգան ներկայացնող «Լեգանեսում»: Նշվում էր, որ Վարդանյանը մոտ է այս թիմի հետ պայմանագիր կնքելուն, սակայն հայ ֆուտբոլիստը վերադարձավ հայրենիք: Արդեն այս տարվա ամառային տրանսֆերային պատուհանի ընթացքում Էրիկ Վարդանյանը մոտ էր Մոսկվայի «Լոկոմոտիվ» տեղափոխվելուն, սակայն վերջին պահին գործարքը տեղի չունեցավ: Ռուսական մամուլը գրում էր, որ հայ ֆուտբոլիստը «Լոկոմոտիվի» շարքերը կհամալրի ձմեռային տրանսֆերային պատուհանի ընթացքում: Նախօրեին Վարդանյանի նկատմամբ հետաքրքրություն էր ցուցաբերել նաև Եկատերինբուրգի «Ուրալը», որտեղ հանդես է գալիս Հայաստանի ազգային հավաքականի մեկ այլ ֆուտբոլիստ՝ Վարազդատ Հարոյանը: Ընթացիկ մրցաշրջանում Վարդանյանը տպավորիչ խաղով աչքի էր ընկել Եվրոպա լիգայի խաղարկությունում:
Մեր ֆուտբոլիստի անմիջական ջանքերով «Փյունիկը» հաղթահարեց որակավորման երկրորդ փուլը՝ պայքարից դուրս թողնելով Չեխիայի ուժեղագույն ակումբներից մեկին՝ «Յաբլոնեցին»: Այս դիմակայությունից հետո հայտնի դարձավ, որ «Յաբլոնեցը» պատրաստ է գնել Վարդանյանի տրանսֆերը: Ոմանք այն կարծիքին են, որ Վարդանյանը կարող էր հայտնվել շատ ավելի ուժեղ թիմում, և որ «Սոչին» այնքան էլ լուրջ ակումբ չէ: Նախ՝ նշենք, որ 2018 թվականին հիմնադրված «Սոչին» Պրեմիեր լիգայի ամենահավակնոտ թիմերից մեկն է: Մասնավորապես, ակումբում կատարվում են լուրջ ներդրումներ, և կարճ ժամանակում հավաքագրվել է բավական ուժեղ կազմ: Այս պահին «Սոչին» 14 միավորով վերջին՝ 16-րդ հորիզոնականում է: Բայց թիմերի միջև միավորների տարբերությունն այնքան խիտ է, որ, օրինակ, 8-րդ հորիզոնականում գտնվող «Կռիլյա Սովետովին» Վարդանյանի նոր թիմը զիջում է ընդամենը 3, իսկ 6-րդ հորիզոնականում գտնվող Մոսկվայի «Սպարտակին»՝ 4 միավորով: Կարծում ենք՝ պարզ է, որ «Սոչին» լուրջ հույսեր է կապում Վարդանյանի հետ և երկրորդ շրջափուլում մտադիր է բարելավել դիրքերը:
Այն, որ Ռուսաստանի Պրեմիեր լիգան իր խաղամակարդակով մի քանի անգամ բարձր է Հայաստանի Բարձրագույն խմբի առաջնությունից՝ անհերքելի է: Հաշվի առնելով Էրիկի տարիքը՝ սա վերջին տարիների ամենահաջող տրանսֆերներից մեկը կարելի է համարել: Սա լուրջ քայլ էր մեր ամենատաղանդավոր ֆուտբոլիստի համար, և հուսով ենք, որ նոր թիմում նա ևս աչքի կընկնի տպավորիչ խաղով:
2009 թվականին Հենրիխ Մխիթարյանը 20 տարեկան էր, երբ պայմանագիր կնքեց Դոնեցկի «Մետալուրգի» հետ: Այն ժամանակ ևս շատ էր խոսվում, որ Մխիթարյանը կարող էր հայտնվել շատ ավելի ուժեղ թիմում: Բայց ժամանակը ցույց տվեց, որ Մխիթարյանի որոշումը միանգամայն ճիշտ էր, և հետևողական աշխատանքի շնորհիվ մեր ֆուտբոլիստը հայտնվեց Եվրոպայի ուժեղագույն թիմերում:
Վարդանյանը կատարեց առաջին քայլը, և հիմա նրան լուրջ փորձություն է սպասվում անհամեմատ ավելի բարձր հարթության վրա: Նշենք, որ մինչև հունվար Վարդանյանը չի կարողանա խաղալ իր նոր թիմում, քանզի տրանսֆերային պատուհանը կբացվի միայն ամանորից հետո:
Հիշեցնենք, որ վերջերս Վարդանյանը երկարաձգել էր «Փյունիկի» հետ գործող պայմանագիրը: Երևանյան ակումբի կազմում նա անցկացրել է 69 հանդիպում և դարձել 13 գոլի ու 10 գոլային փոխանցման հեղինակ: 2017 թվականից կիսապաշտպանը հանդես է գալիս նաև Հայաստանի հավաքականում, որի կազմում մասնակցել է 3 հանդիպման և խփել 1 գոլ:
