Ադրբեջանական ANS PRESS-ի փոխանցմամբ՝ Ադրբեջանի արտգործնախարար Էլմար Մամեդյարովը Интерфакс գործակալությանը տված հարցազրույցի ժամանակ հույս է հայտնել, որ Գյումրիի ռուսական ռազմաբազան չի կիրառվի հակաադրբեջանական նպատակներով.
«Մենք նույնպես Ռուսաստանի Դաշնության հետ ունենք բավական բարձր մակարդակի ռազմա-քաղաքական համագործակցություն։ Չեմ կարծում, թե Գյումրիի ռուսական ռազմաբազան կձեռնարկի որևէ հակաադրբեջանական գործողություն, ինչը կհակասի Ադրբեջանի ու Ռուսաստանի փոխհարաբերությունների մակարդակին։
Ադրբեջանը չի միջամտում «իր ամրակետի հետ Ռուսաստանի հարաբերություններին»։ Դրա համար էլ դա Ռուսաստանի գործն է՝ ինչպես ամրացնել և պահպանել իր ամրակետը։ Մյուս կողմից էլ մենք, իհարկե, կցանկանայինք ավելի մեծ թափանցիկություն ու պարզություն որոշումների հարցում, որպեսզի կանխատեսելի լիներ և յուրաքանչյուրն իմանար, թե ով ում կողքին է կանգնած»։
Հիշեցնենք, որ օրեր առաջ թուրքական Միջազգային ռազմավարական հետազոտությունների կենտրոնի (USAK)՝ Եվրասիայի հարցերով փորձագետ Հասան Սելիմ Օզերթեմը Journal of Turkish Weekly-ին տված հարցազրույցի ժամանակ հայտարարել էր, որ Գյումրիի ռուսական ռազմաբազան հանդիսանում է «Կովկասում ռուսական ամրոց», և որի օգնությամբ Ռուսաստանը վերահսկում է Կովկասը, Հյուսիսային Իրանը և Կասպից ծովի ավազանը։
