Սյունիքի մարզի ընդհանուր իրավասության դատարանում Նապոլեոն Օհանյանի նախագահությամբ ավարտվել է Ալեն Հովհաննիսյանի գործի դատական քննությունը:
1979 թվականին ծնված Ալեն Հովհաննիսյանը դեպքի պահին 36 տարեկան էր: Դեպքը տեղի է ունեցել 2015 թվականի հուլիսի 23-ին: Ալեն Հովհաննիսյանի մեղավորությամբ տեղի է ունեցել ճանապարհատրանսպորտային ողբերգական պատահար, որի արդյունքում մահացել է չորս մարդ, այդ թվում՝ 4 տարեկան աղջնակ, մի քանի հոգի, նաև՝ 2 տարեկան երեխա, մարմնական վնասվածքներ են ստացել:
Ըստ մեղադրանքի՝ 2015 թվականի հուլիսի 23-ին, ժամը 12-ն անց 30-ի սահմաններում Ալեն Հովհաննիսյանը, վարելով անձնական օգտագործման «Մերսեդես Բենց» մեքենան, Մեղրի-Երևան ավտոճանապարհի 168–րդ կմ հատվածում դուրս է եկել հանդիպակաց երթևեկելի ուղեմաս, թույլ է տվել ՃԵԿ համապատասխան դրույթների խախտումներ և բախվել է այդ ուղեմասով երթևեկող «Օպել Վեկտրա» մեքենային, ինչի հետևանքով «Օպել» մեքենայում գտնվող չորս մարդ՝ վարորդը՝ 50-ամյա Սիմոն Պ.-ն, Ուկրաինայի 43-ամյա քաղաքացի Արկադյա Գ.-ն, 21-ամյա Քրիստինա Գ.-ն, Երևանի 4-ամյա բնակչուհի Մանե Ա.-ն տեղում մահացել են, իսկ Մանեի 2 տարեկան եղբոր՝ Հարությունի առողջությանը պատճառվել է տևական քայքայումով միջին ծանրության վնաս:
Դեպքից հետո «Մերսեդեսի» վարորդ Ալեն Հովհաննիսյանը դիմել է փախուստի:
Նրան մեղադրանք էր առաջադրվել չորս մարդու կյանք խլած պատահարի ու պատահարի վայրից հեռանալու համար՝ ՀՀ քրեական օրենսգրքի 242 հոդվածի 3-րդ մասով և 244 հոդվածով:
Պարզվել է, որ փախչելով դեպքի վայրից՝ Ալեն Հովհաննիսյանը հատել էր ՀՀ սահմանն ու մեկնել էր Ռուսաստան:
Ալեն Հովհաննիսյանի նկատմամբ հայտարարվել էր հետախուզում, նրա խափանման միջոց էր ընտրվել կալանավորումը:
Ալեն Հովհաննիսյանը բռնվել ու այս գործով արգելանքի տակ է առնվել ՌԴ-ում՝ 2015 թվականի սեպտեմբերի 14-ին: Արգելանքից նա ազատվել է 2016 թվականի մարտի15-ին՝ այս՝ հայաստանյան վթարի գործով արգելանքի տակ գտնվելով 6 ամիս 1 օր: Հայաստանում ողբերգական վթարի քրեական գործի քննությունը կասեցվել էր՝ մինչև Ալեն Հովհաննիսյանի հայտնաբերումը:
Բայց Ալեն Հովհաննիսյանը չի «հասցրել» վերադառնալ Հայաստան, նա 2016 թվականի օգոստոսի 10-ից մինչև 2019 թվականի օգոստոսի 9-ը ՌԴ Մոսկվա քաղաքի Օստանկինոյի շրջանային դատարանի դատավճռի համաձայն մեկ այլ՝ ռուսաստանյան գործով ազատազրկման ձևով պատիժ է ստացել ու կրել Ռուսաստանում:
Պատժից Ալեն Հովհաննիսյանն ազատվել ու անմիջապես ժամանել է Հայաստան:
2019 թվականի օգոստոսի 10-ին նա հայտնաբերվել է «Զվարթնոց» օդանավակայանում, բռնվել է, չորս տարի առաջ կատարված վթարի կասեցված գործի քննությունը նույն օրը վերսկսվել է:
Սյունիքի մարզի ընդհանուր իրավասության դատարանում 4 տարի անց Ալեն Հովհաննիսյանն իրեն լիովին մեղավոր է ճանաչել 4 մարդու կյանք խլած վթարի համար, զղջացել է:
Տուժողների իրավահաջորդները միջնորդել են Ալեն Հովհաննիսյանի նկատմամբ խիստ պատիժ սահմանել:
Տուժողի իրավահաջորդ Սիլվա Թ.-ն ներկայացրել է 8 հազար դոլարին համարժեք դրամի քաղաքացիական հայցի պահանջ՝ որպես հուղարկավորության ծախսերի հատուցում:
Ամբաստանյալ Ալեն Հովհաննիսյանն առարկել է քաղաքացիական հայցի ներկայացված չափի դեմ, խնդրել է քաղաքացիական հայցը թողնել առանց քննության:
Դատարանը Ալեն Հովհաննիսյանին մեղավոր է ճանաչել ՀՀ քրեական օրենսգրքի 242 հոդվածի 3-րդ մասով և դատապարտվել է 6 տարի 8 ամիս ազատազրկման՝ 3 տարով զրկվելով տրանսպորտային միջոցներ վարելու իրավունքից: Նշանակված ազատազրկման ձևով պատժին հաշվակցվել է ՌԴ-ում այս գործով Հովհաննիսյանի կրած նախնական կալանքի 6 ամիս 1օրը, վերջնական պատիժ է սահմանվել 6 տարի 1 ամիս 29 օր ազատազրկումը:
Պատժի սկիզբը՝ 2019 թվականի օգոստոսի 10-ից:
Դատարանն առանց քննության է թողել տուժողի իրավահաջորդի ներկայացրած քաղհայցի պահանջը՝ վերջինիս իրավունք վերապահելով այն ներկայացնելու քաղաքացիական դատավարության կարգով: