Գործարանային արտադրության գինիների մրցույթներում «ԱրմԱաս»-ի արտադրանքն արդեն ստացել է 38 միջազգային մրցանակ: «Առաջին լրատվական»-ի հետ զրույցում այս մասին ասաց «ԱրմԱս» գինու գործարանի տնօրեն Վիկտորիա Ասլանյանը: Նրա խոսքով՝ դա առաջին հերթին պայմանավորված է տեղանքով. «Հայաստանն օրհնված է որպես խաղողի աճեցման լավագույն տեղանք. մեր երկիրը գտնվում է 45-րդ օղակի վրա՝ այստեղ արևի շողերը յուրահատուկ ձևով են հասնում խաղողի վազերին, որը կոչվում է «45-րդ օղակի հրաշք»: Բացի դրանից՝ մեր երկիրը շատ բարձր է ծովի մակարդակից՝ 900-1900մ, և այստեղ 300 օր արև կա, ցուրտ ձմեռը թույլ է տալիս, որ խաղողի վազերը հանգստանան, շոգ ամառը նպաստում է, որ խաղողը հասնի, և ամռան զով երեկոները հնարավորություն են տալիս, որ խաղողի բաղադրիչների համադրությունը լինի իդեալական: Թե՛ բիբլիական լեգենդը, թե՛ իրականությունը վկայում են՝ պատահական չէ, որ Հայաստանը համարվում է խաղողի և գինու ծննդավայրը: Մենք ունենք խաղողի յուրահատուկ տեղական սորտեր… Հայաստանն արտադրում է միջազգային քիմքին համապատասխան արտակարգ գինիներ»:
Մեր զրուցակիցը վստահեցնում է, որ գինեգործության զարգացումը կարող է նպաստել տարբեր ոլորտների առաջընթացին՝ այդ թվում՝ գյուղատնտեսության, արտահանման, մշակույթի և տուրիզմի զարգացմանը և ազգային արժեքների պահպանմանը:
Վ. Ասլանյանի խոսքով՝ Հայաստանը համարվում է գինու տուրիզմի լավագույն տասը վայրերից մեկը: ««ԱրմԱսը» կազմակերպում է գեղեցիկ միջոցառումներ, գինու հյուրասիրություններ և դրանով ոչ միայն նպաստում է տուրիզմի զարգացմանը, այլ նաև գինու արտահանման շուկայի ընդլայնմանը: Գինու ոլորտն ունի հնարավորություն, որ դառնա Հայաստանի բրենդը»,- նշեց մեր զրուցակիցը՝ հավելելով, որ պետության կողմից մեծ ներդրում պետք է կատարվի գինու տուրիզմը խթանելու համար:
Մանրամասն՝ տեսանյութում:
