Սիրիայի հայերի հայրենասիրության հարցն ապացուցվել է պատերազմի ժամանակ և այդ առումով բոլոր կասկածները ցրվել են: Այդ մասին հայտարարել է Սիրիայի նախագահ Բաշար Ասադը՝ նշելով, որ Սիրիայի հայերը ինտեգրվել են, սակայն չեն ձուլվել հասարակության մեջ, հաղորդում է ՍԱՆԱ պետական տեղեկատվական գործակալությունը:
Ասադի խոսքով՝ հայերը վերջում են միացել սիրիական հանրությանը և առավելապես ունեն հայրենասիրական տրամադրվածություն:
«Հայրենասիրության մասին հարցն ապացուցվել է պատերազմի ժամանակ և այդ առնչությամբ բոլոր կասկածները ցրված են: Միևնույն ժամանակ Սիրիայի քաղաքացիների այդ խումբն ունի իր կազմակերպությունները, իր եկեղեցիները և, ինչն ավելի կարևոր է, իր դպրոցները: Եթե դուք այցելում եք որևէ հայկական տոնախմբություն՝ հարսանիք կամ որևէ այլ միջոցառում, ես ունեմ հայ ընկերներ, և ես այցելել եմ այդպիսի միջոցառումներ, նրանք այդ ժամանակ երգում են իրենց ավանդական երգերը, սակայն հետո նրանք երգում են ազգային երգեր»,- ասել է Ասադը:
Նրա կարծիքով՝ չկա ազատության ավելի մեծ ձև, քան դա է: Եվ հայերը ձուլվել են սիրիական հասարակությունում շատ ավելի պակաս, քան ուրիշ համայնքների ներկայացուցիչները: «Նրանք ինտեգրվել են, սակայն չեն ձուլվել սիրիական հասարակության մեջ, պահպանել են իրենց ինքնությունը»:
Նախագահի կարծիքով՝ դրանից ելնելով՝ իշխանությունները պետք է գործեն հայերի հետ մի մոտեցմամբ, քրդերի հետ՝ մեկ ուրիշ: Իսկ պատճառն այն է, նրա խոսքով, որ վերջիններիս շրջանում կան սեպարատիստական տրամադրություններ: Կան անգամ աշխարհագրական քարտեզներ, որոնք ներկայացնում են Սիրիական Քրդստանը որպես ընդհանուր Քրդստանի մաս: «Մենք իրավունք ունենք պաշտպանել մեր տարածքային ամբողջականությունը, և խուսափել սեպարատիստական դատողություններից: Մենք խնդիր չունենք այսպես կոչված «սիրիական բազմազանության» հետ: Հակառակը, այն հարուստ է և գեղեցիկ: Սակայն հարստությունն ու բազմազանությունը մի բան է, իսկ առանձնացումն ու երկրի մասնատումը՝ բոլորովին այլ, լրիվ հակառակ պատկեր է: Եվ հենց դա է խնդիրը»,- նշել է Ասադը:
