Վրացի, քրեական իրավունքի պրոֆեսոր Էդիշեր Պուտկարաձեն կարծում է, որ անցումային արդարադատությունը, դատաիրավական համակարգում բարեփոխումները պետք է իրականացվեն նախկին խորհրդային ճամբարի բոլոր երկրներում, որպեսզի զարգանա իրավական համակարգը։
Այդ մասին «Առաջին լրատվական»-ի հետ զրույցում նշեց Էդիշեր Պուտկարաձեն, որը հոկտեմբերի 31-ին մասնակցում էր Գերմանահայկական իրավաբանների միության և ՀՀ փաստաբանների պալատի համատեղ կազմակերպած քննարկմանը։
«Հայաստանը, որպես նախկին խորհրդային ճամբարի կովկասյան երկիր, պետք է ևս իրականացնի բարեփոխումներ։ Մենք ունենք լավ հարաբերություններ մեր հայ գործընկերների հետ, քննարկել ենք քրեական իրավունքին վերաբերող հարցեր։ Մենք տեղեկացանք, որ ընդունվելու է նոր Քրեական օրենսգիրք, որտեղ հաշվի կառնվեն շատ հարցեր։ Այնտեղ հաշվի կառնվեն ժամանակակից հնարավորությունները։ Այդ իսկ պատճառով էլ կարծում եմ, որ Հայաստանում իրավական ոլորտին առնչվող բարեփոխումները ճիշտ ուղու վրա են։ Ես զրուցել եմ Երևանի պետական համալսարանի իրավագիտության ֆակուլտետի դեկանի, այլ գործընկերների՝ պրոֆեսորների հետ, որոնք կողմ են բարեփոխումներին։ Հետխորհրդային երկրներին բնորոշ է անցումային փուլը, որովհետև խորհրդային օրենսդրությունը չի համապատասխանում ժամանակակից պահանջներին»,- ասաց Էդիշեր Պուտկարաձեն։
Հարցին, թե Վրաստանում ինչպես է ընթացել անցումային արդարադատությունը, մեր զրուցակիցը պատասխանեց․ «Հետխորհրդային երկրներից Վրաստանի օրենսդրությունը բավականին բարձր մակարդակի վրա է գտնվում, որովհետև մենք լավ կապեր ունենք մեր արևմտյան գործընկերների, փորձագետների հետ։ Եվ այդ փորձագետներն էլ մեզ օգնել են նոր օրենսդրություն ընդունելիս։ Հայաստանում պետք է իրականացվեն դատաիրավական համակարգի բարեփոխումներ, առանց դրանց անհնար է դառնալ ժամանակակից պետություն»։
