Մեծ ջանքերի և զոհողությունների արդյունքում Թուրքիայի կողմից Սիրիայում ստեղծված անվտանգության գոտիներն այսօր ապրելու համար ամենախաղաղ վայրերն են: Այս մասին հայտարարել է Թուրքիայի նախագահ Ռեջեփ Թայիփ Էրդողանը՝ մեկնաբանելով Անկարայի քայլերը սիրիական կարգավորման ուղղությամբ:
Նախագահ Էրդողանը ափսոսանք է հայտնել, որ միջազգային հանրությունը համարժեք աջակցություն չի ցուցաբերել այս հարցում Թուրքիայի ջանքերին: «Սիրիական ճգնաժամի ուղղությամբ քայլեր ձեռնարկելիս Թուրքիան մենակ մնաց», – ասաց Թուրքիայի ղեկավարը:
«Նրանք, ովքեր վերջին 8 տարիներին սիրիացի փախստականների համար բացի փշալարեր կապելուց ոչինչ չեն ձեռնարկել, շարունակում են խոչընդոտել նրանց տառապանքները թեթևացնելու ջանքերը», – ավելացրեց Թուրքիայի նախագահը:
Պետության ղեկավարը հիշեցրել է, որ ավելի քան 8,5 տարի փախստականներին պատսպարելու համար Թուրքիայի ծախսերը գերազանցել են $ 40 միլիարդը, մինչդեռ ԵՄ-ն ՀԿ-ների միջոցով այս նպատակի համար հատկացրել է ընդամենը 3 միլիարդ եվրո:
«Փախստականների մասին հոգալիս, դրա դիմաց ոչինչ չէինք ակնկալում, մենք դա արեցինք՝ հիմնվելով մեր մարդկային և բարոյական սկզբունքների վրա», – ասաց նախագահ Էրդողանը:
Ըստ Էրդողանի՝ փախստականների իրավիճակը կարգավորելու հարցում լուրջ աջակցության փոխարեն Թուրքիան «միջազգային հանրությունից միայն խորհուրդներ է ստացել»:
Էրդողանը շեշտեց, որ, ի տարբերություն որոշ երկրների, միջազգային խնդիրների լուծման գործում Թուրքիան հենվում է բացառապես հումանիզմի և արդարության սկզբունքների վրա: «Նավթի կաթիլը արյան կաթիլից բարձր դասելը թույլ չի տալիս սեփական շահերից զատ այլ բան տեսնել ինչպես Սիրիայում, այնպես էլ ամբողջ աշխարհում: Մեզ համար մարդիկ, հոգիները և կյանքը առաջնային են», – ասաց նա:
Պետության ղեկավարը Պակիստանում հրդեհի հետևանքով բազմաթիվ զոհերի առթիվ նույնպես ցավակցություն է հայտնել: