Հոկտեմբերի 24-ին կառավարության նիստում ի թիվս այլ հարցերի կառավարությունը քննարկեց ու հավանության արժանացրեց գյուղատնտեսության ոլորտում ապահովագրական համակարգի ներդրման պիլոտային ծրագիրը, որը նախատեսում է պետական աջակցություն ցուցաբերել գյուղատնտեսներին՝ ապահովագրական համակարգի ներդրման միջոցով։
Հայաստանի ագրարագյուղացիական միավորման նախագահ Հրաչ Բերբերյանը «Առաջին լրատվական»-ի հետ զրույցում ընդհանուր առմամբ դրական գնահատեց կառավարության այս նախագիծը՝ նշելով, որ գյուղատնտեսության կայուն զարգացման համար՝ սա չափազանց կարևոր և սպասված որոշում էր, սակայն միևնույն ժամանակ թվարկեց նաև մի քանի գործոններ, որոնք նրա համոզմամբ՝ հաշվի չեն առնվել կառավարության կողմից և ըստ այդմ՝ կարող են բացասաբար ազդել այս ծրագրի իրականացման վրա։
«Նախևառաջ, պարտադիր կերպով պետք է ունենաս երաշխավորված ոռոգման համակարգ, որպեսզի երաշտի կամ այլ խնդիրների առկայության դեպքում՝ ֆերմերը փաստի առաջ չկանգնի։ Այսօր բոլորս շատ լավ գիտենք, թե ՋՕ-երում ինչ վիճակ է տիրում, ինչ մոնոպոլիա է այստեղ գործում, իսկ երբ ՊՎԾ-ն այնտեղ ստուգումներ իրականացրեց ու հայտնաբերեց այդ համակարգում խախտումներն ու չարաշահումները՝ տեսանք, թե ՊՎԾ նախկին ղեկավարին ինչպես պատժեցին։ Նույն պատկերը չունենալու համար՝ ՋՕ-երի աշխատանքի կանոնակարգման կարևորագույն լուծումը օրենսդրական փոփոխություններ են։
Երկրորդը՝ հակակարկտային համակարգի աշխատանքն է․ հին համակարգը բանի պետք չէ, իրեն չի արդարացնում, իսկ նորն էլ դեռ չեն փորձարկում, այդ հրթիռային ծառայությունը, որը որ պետք է ներդրվեր՝ դեռ չի գործում։ Այսինքն ստացվում է, որ մեր հակակարկտային ծառայությունն անգամ 10 տոկոս էֆեկտիվություն չունի, ինչը նշանակում է, որ այստեղ ռիսկը շատ բարձր է։
Երրորդ՝ պետք է ունենալ բույսերի պաշտպանություն, օրինակ մորմազգու ցեցի դեմ պայքարելու մասին վարչապետը մի քանի անգամ հայտարարեց, բայց սայլը տեղից չի շարժվում ու դրա համար հատկացվող գումարներն էլ փոշիացվում են։
Եվ չորրորդ՝ անասնաբուժությունը, այսինքն մենք պետք է ունենանք կատարյալ անասնաբուժական համակարգ, որպեսզի ամեն տարի ֆիքսող և տարեցտարի ավելացող հիվանդությունները կարողանանք կանխարգելել»,- ընդգծեց Հրաչ Բերբերյանն ու հավելեց, որ քանի դեռ այս չորս կարևոր նախապայմաններն ապահովված չեն, ապա չես կարող ունենալ ապահովագրական գործակալություն կամ ակնկալել, որ դրա աշխատանքն արդյունավետ կլինի։
Մանրամասները՝ տեսանյութում։