Այսօր քաղաքական, վերլուծական շրջանակների ուշադրության կենտրոնում է հայտնվել ՀՀ երրորդ նախագահի հարցազրույցը Անդրանիկ Մարգարյանի անվան ՀՀԿ քաղաքական դպրոցի շրջանավարտների հետ հանդիպման ժամանակ: Սերժ Սարգսյանը լռությունը հերթական անգամ խախտում է մի ժամանակահատվածում, երբ թե՛ ներքին, թե՛ արտաքին տիրույթում տեղի են ունենում նշանակալի զարգացումներ, ըստ այդմ՝ կան մեսիջի թե՛ ներքին, թե՛ արտաքին «հիմքեր»: Նախկին նախագահը շոշափում է իր ձերբակալության թեման՝ հայտարարելով, որ մոտենում է քաղաքացու հետ անկեղծ զրույցի պահը:
Թեմայի շուրջ «Առաջին լրատվական»-ի հետ քննարկմանը մասնակցեցին քաղաքագետ Ռուբեն Մեհրաբյանը, «Քաղաքացու որոշում» կուսակցության գործադիր մարմնի անդամ Գարեգին Միսկարյանը և «Քաղաքացիական պայմանագիր» կուսակցության հանրային կապերի պատասխանատու Վահագն Ալեքսանյանը:
Գարեգին Միսկարյանի դիտարկմամբ՝ այդ հարցազրույցը քաղաքական բովանդակություն չուներ. «Ինձ թվում է դա կարելի է դիտարկել որպես սովորական «տատի հեքիաթներից» մի հատված: Կարծում եմ՝ հօգուտ իրեն է, որ ամեն անգամ չի խոսում Ս. Սարգսյանը, որովհետև եթե ամեն անգամ այսպիսի հայտարարություններ անի, չեղած կշիռն էլ կարող է վատնել»:
«Մի տարուց ավել է մեզ ասում են, որ Ս. Սարգսյանը խոսելու է, բայց այն, որ նա քաղաքական տեքստ կասի, չէինք սպասում, և նրա այս հայտարարության մեջ նույնպես քաղաքական բովանդակություն չկար»,- նշեց Վահագն Ալեքսանյանը:
Ռուբեն Մեհրաբյանի կարծիքով նույնպես Ս. Սարգսյանի «այդ մի քանի նախադասության» մեջ քաղաքական ոչինչ չկար և ոչ էլ մեսիջներ: «Եթե պարոն Սարգսյանը հրապարակային խոսք է ասում, դա դեռ չի նշանակում, որ արդեն իսկ քաղաքական ուղերձ է հղում: Ասելով, որ եթե ժողովուրդը դրանից երջանիկ կլինի, թող ինձ ձերբակալեն, Ս. Սարգսյանը երևի ուզում էր, որ մենք հուզվենք, այլ բան չի բխում նրա ասածից»,- նշեց քաղաքագետը:
Անդրադառնալով դիտարկմանը, որ նախկին նախագահն արդեն երկրորդ անգամն է խոսում հավանական ձերբակալության մասին, Ռ. Մեհրաբյանը նշեց. «Նայենք փաստերին՝ Ս. Սարգսյանը եղել է Մարտի 1-ի թիվ մեկ շահառուն… Հայաստանում ամեն ինչ ի վերջո պետք է գնա իրավական ճանապարհով»: Քաղաքագետի դիտարկմամբ՝ այս հանդիպումը «թատրոն էր»:
Վ. Ալեքսանյանի խոսքով՝ ձերբակալության մասին Ս. Սարգսյանի խոսելը ցինիկություն էր, բայց կարևոր է, որ նա ընդունում է՝ իր իշխանությունը ձախողել է Հոկտեմբերի 27-ի և Մարտի 1-ի բացահայտումը:
Քննարկման մասնակիցների կարծիքով՝ ուշադրություն չպետք է դարձնել այսպիսի հայտարարություններին և դրանցից որևէ հետևություն չպետք է անել:
Մանրամասն՝ տեսանյութում:
