Կալիֆոռնիայում մոլեգնող բնական հրդեհն ընդհուպ մոտեցել է Ռոնալդ Ռեյգանի նախագահական գրադարանին, որն ամենամեծն է ԱՄՆ-ի տասներեք դաշնային նախագահական գրադարաններից: Այդ մասին հոկտեմբերի 31-ին հայտնել է Associated Press-ը:
Հրշեջները ջանում են կանգնեցնել կրակի հետագա տարածումը, որն արդեն շենքից մոտ 30 մետր հեռավորության վրա է գտնվում: Գրադարանի ֆոնդում պահվում է 60 մլն էջ փաստաթուղթ, ավելի քան 1,6 մլն լուսանկար, 150 կիլոմետր կինոժապավեն, տասնյակ հազար լսա- և տեսաերիզներ: Թանգարանի արխիվներում պահվում են նաև Ռեյգանի անձնական փաստաթղթերը: Բացի դրանից, գրադարանի շենքերի համալիրի տարածքում թաղված է ԱՄՆ քառասուներորդ նախագահը՝ Ռոնալդ Ռեյգանը: Գրադարանի ներկայացուցիչը հավաստիացրել է, որ առայժմ տարածքը հրդեհից վնասներ չի կրել:
Կալիֆոռնիայի Լոս Անջելեսի և Վենտուրայի շրջանների մեծ մասում պահպանվում է հրդեհավտանգության բարձր մակարդակը: Ազգային օդերևութաբանական ծառայությունը նախազգուշացնում է չոր եղանակի և 112 կմ/ժ արագությամբ քամու պատճառով բռնկումների մեծ վտանգի մասին: Հոկտեմբերի լույս 31-ի գիշերը կրակն ընդգրկել է Լոս Անջելեսից հյուսիս՝ Սիմի-Վելի և Մուրփարք քաղաքների միջև ընկած տարածքը: Հրշեջները պահանջել են շուրջ 30 հազար մարդու տարհանում:
Չդադարող բնական հրդեհների պատճառով հոկտեմբերի 30-ին Կալիֆոռնիայի 30 շրջաններում ավելի քան 1,5 մլն մարդ մնացել է առանց էլեկտրաէներգիայի:
Կոմունալ ծառայությունները հաճախակի անջատում են էներգամատակարարումը՝ հյուսիսում և հարավում մոլեգնող հրդեհներից իրենց սարքավորումները պաշտպանելու համար։ Կալիֆոռնիայում բնական հրդեհների պատճառով Լոս Անջելեսի մի քանի շրջաններում զանգվածային տարհանումներ են իրականացվում:
Անցած կիրակի Կալիֆոռնիայի նահանգապետ Գևին Նյուսոմը հայտարարել է նահանգի ամբողջ տարածքում արտակարգ դրության ռեժիմ սահմանելու մասին:
Կալիֆոռնիայի 58 շրջաններից 43-ում հայտարարված է վտանգի կարմիր մակարդակ: Նյուսոմի խոսքով՝ Կալիֆոռնիայում հոկտեմբերին մշտապես մոլեգնող հրդեհներն այս տարի առանձնակի վտանգ են ներկայացնում, հաղորդել է «Ինտերֆաքս»-ը: