Նախօրեին Քննչական կոմիտեի ղեկավար Հայկ Գրիգորյանը հայտարարել է, որ Ամուլսարի հարցում առաջիկայում հնարավոր է հարցաքննվեն «Էլարդ»-ի փորձագետները: Թեմայի շուրջ զրուցելու համար «Առաջին լրատվական»-ը հյուրընկալել է բնապահպաններ Թեհմինե Ենոքյանին և Լևոն Գալստյանին:
Այս առնչությամբ Լևոն Գալստյանն ասաց. «Ոչ թե «Էլարդը» խճճեց ամեն ինչ, այլ խճճեցին քննչական խմբի ղեկավար Իվանյանն ու իր քննչական խումբը, ինչը գործը տարավ փակուղի: Դա բացահայտվեց հանրային ճնշման արդյունքում: Հիմա ամբողջովին նոր խումբ է ձևավորվել, և ես կարծում եմ՝ քննության ընթացքում բազմաթիվ նոր հանգամանքներ կբացահայտվեն»:
Մեր զրուցակցի խոսքով՝ Ամուլսարի ծրագիրը պետք է կասեցվեր հեղափոխությունից անմիջապես հետո. «Քանի որ ծրագիրը դեռ չէր սկսվել, և կար տեղի բնակչության բացահայտ ընդվզում: Եթե անցյալ տարվա հունիսի 22-ին տեղացիները փակած չլինեին ճանապարհը, մենք այսօր այստեղ խոսելու թեմա չէինք ունենա, որովհետև սարն արդեն պայթեցրած կլինեին, և հանքավայրն էլ արդեն բացած կլինեին»:
Թեհմինե Ենոքյանն էլ չի կարծում, որ մեկ այլ փորձագետ պետք է գա և Հայաստանի համար իրավավարչարարություն իրականացնի, որպեսզի հստակ ասվի, թե ՀՀ օրենսդրության որ կետն է խախտվել. «Այդուհանդերձ, Քննչական կոմիտեն նոր խումբ է հավաքել, փորձում է նոր փաստեր հավաքագրել: Չգիտեմ՝ դա ինչով կավարտվի»:
Հարցազրույցն ամբողջությամբ՝ տեսանյութում:
