Սերժ Սարգսյանը Անդրանիկ Մարգարյանի անվան ՀՀԿ քաղաքական դպրոցի շրջանավարտների հետ հանդիպմանը հայտարարել է, թե մոտենում է քաղաքացու հետ անկեղծ զրույցի պահը: Այդ զրույցի անոնսը ՀՀԿ-ն և Սերժ Սարգսյանն անում են արդեն գրեթե մեկ տարի կամ գուցե մի փոքր պակաս, սակայն այդպես էլ չի մատնանշվում կոնկրետ ժամկետ: Պահն անընդհատ մոտենում է, բայց այդպես միաժամանակ, իհարկե, կարող է ձգվել պահն անվերջ կամ շատ երկար:
Կոնկրետ ժամկետի մատնանշման բացակայությունը հուշում է, որ Սերժ Սարգսյանն այդ զրույցի մասին ազդարարմամբ շատ կոնկրետ ազդակ կամ մեսիջ է հղում շատ կոնկրետ հասցեատերերի, որ ինքը խոսելու, ասելու բան ունի և կարող է խոսել: Ո՞վ է Սերժ Սարգսյանի մեսիջի հասցեատերը, այն նոր իշխանության շրջանակո՞ւմ է, թե՞ հին համակարգի, թե՞ Հայաստանի նոր ու հին իշխանության շրջանակից դուրս է, Հայաստանի սահմանից դուրս: Սերժ Սարգսյանը լռությունը հերթական անգամ կիսախախտում է մի ժամանակահատվածում, երբ թե՛ ներքին, թե՛ արտաքին տիրույթում տեղի են ունենում հետաքրքիր և նշանակալի զարգացումներ, ըստ այդմ՝ կան մեսիջի թե՛ ներքին, թե՛ արտաքին «հիմքեր»:
Նա շոշափում է իր ձերբակալության թեման քաղաքացու հետ անկեղծ զրույցի համատեքստում: Նշանակո՞ւմ է դա արդյոք, որ Սարգսյանն ինչ-որ մեկին սպառնում է կամ զգուշացնում, որ եթե իրեն ձերբակալեն, ապա ինքը կխոսի և ենթադրաբար կասի բաներ, որոնք «ձերբակալողի» կամ «ձերբակալելու հարց» դնողի համար այնքան էլ շահեկան չեն: Ընդ որում, այստեղ նաև բարդ է միարժեք պնդել, թե որ շրջանակում է սրությամբ դրվում Սերժ Սարգսյանի ձերբակալման թեման, որ Սարգսյանն էլ փորձում է արդեն անձամբ կատարել պաշտպանական քայլեր:
Հիշենք, որ թեման մի քանի ամիս առաջ դարձյալ ուղիղ իմաստով շրջանառվեց, և այդ դեպքում այն շրջանառության մեջ դրեց Սերժ Սարգսյանի փեսան՝ Միքայել Մինասյանը: Այժմ Սերժ Սարգսյանն անձամբ է շրջանառում թեման, ինչը թերևս նշանակում է, որ դրա շուրջ առկա են նոր զարգացումներ, կամ առկա են զարգացումներ, որ դարձյալ կարիք է առաջանում ձերբակալության թեմայի շրջանառմամբ արձագանքելու դրանց և արդեն՝ Սերժ Սարգսյանի մակարդակով: