Լուրեր
ՍԴ շուրջ կատաղի պայքար է, Բուքիքիոյի գնահատականները պետք է ընդունել ի գիտություն
  • 21:30
  • 2019-10-30
  • Դիտումներ՝ *

Վենետիկի հանձնաժողովի նախագահ Ջանի Բուքիքիոն մտահոգություն է հայտնել Հայաստանում խորհրդարանի և Սահմանադրական դատարանի միջև առաջացած «բաց կոնֆլիկտի» պատճառով: Արդյո՞ք Բուքիքիոն ակնարկում է կոնֆլիկտի այն մասը, որը կազմում են ՍԴ նախագահի շուրջ հարուցված քրեական գործերը, որոնց ուղիղ հիշատակումից, այնուամենայնիվ, Բուքիքիոն խուսափում է: Ամեն դեպքում Վենետիկի հանձնաժողովի նախագահը, հանդես գալով հայտարարությամբ, կողմերին կոչ է անում «զսպվածություն, փոխադարձ հարգանք ցուցաբերել միմյանց իրավասությունների նկատմամբ և իրավիճակը հանդարտեցնել գործակցության վրա հիմնված լուծումներով:

Թեմայի շուրջ «Առաջին լրատվական»-ի հետ քննարմանը մասնակցեցին ԱԺ «Իմ քայլը» խմբակցության պատգամավոր Նիկոլայ Բաղդասարյանը, վերլուծաբաններ Գառնիկ Գևորգյանը և Արշալույս Մղդեսյանը:

Գառնիկ Գևորգյանի դիտարկմամբ՝ Բուքիքիոյին յուրաքանչյուրը հասկացել է այնպես, ինչպես իրեն է ձեռնտու: «Հայտարարությունը հավասարակշռված էր և զուսպ, տեղավորվում էր եվրոպացիների կողմից կիրառվող երկակի ստանդարտների շրջանակներում՝ այսինքն՝ հա՛մ նալին խփելու, հա՛մ մեխին խփելու մարտավարության շրջանակներում էր,- նշեց վերլուծաբանը: -Վենետիկի հանձնաժողովի նախագահի հայտարարությունը թեև մի քիչ խիստ էր և ակնարկների առումով՝ բաց, սակայն Բուքիքիոյի գնահատականները պետք է ընդամենը ընդունել ի գիտություն»:

Նիկոլայ Բաղդասարյանը հակադարձեց՝ նշելով, որ Վենետիկի հանձնաժողովի նախագահն այն անձը չէ, որի տեսակետը Հայաստանի իշխանությունը պետք է ի գիտություն ընդունի: Պատգամավորի խոսքով՝ ժամանակին, երբ ՀՀ այժմ գործող Սահմանադրություն էր ընդունվում, մամուլում հրապարակվել էին փաստեր, որոնք վկայում էին, որ տվյալ անձը որոշակի շահագրգռվածություն ունի և կապեր ունի նախորդ իշխանությունների հետ:

Ի՞նչ է ակնարկում Բուքիքիոն՝ բաց կոնֆլիկտ ասելով: Ի պատասխան այս հարցի՝ Արշալույս Մղդեսյանը նշեց, որ այս արտահայտությունը գուցե մի փոքր վառ է ներկայացնում այն, ինչ տեղի է ունենում Հայաստանում, բայց Բուքիքիոն ֆիքսել է այն, ինչ իրականում կա: «Քաղաքական, քաղաքագիտական և հանրային ընկալման տեսակետից սա քաղաքական կոնֆլիկտ է… Զուգահեռաբար ընթանում է նաև իրավական գործընթաց»,- նշեց վերլուծաբանը:

Քննարկման մասնակիցների դիտարկմամբ՝ Սահմանադրական դատարանի շուրջ առկա է ճգնաժամ, և ՍԴ շուրջ կատաղի պայքար է տարվում:

 

Մանրամասն՝ տեսանյութում:

  • Դիտումներ՝ *