Երևանի ընդհանուր իրավասության դատարանի՝ Շենգավիթ վարչական շրջանում գտնվող նստավայրում Դավիթ Բալայանի նախագահությամբ շարունակվեց Կարեն Հ.-ի գործի դատական քննությունը:
39-ամյա Կարեն Հ.-ին մեղադրանք է առաջադրված առանձին դաժանությամբ կատարված սպանության համար՝ ՀՀ քրեական օրենսգրքի 104 հոդվածի 2-րդ մասի 5-րդ կետով:
Ըստ մեղադրանքի՝ Կարեն Հ.-ն առանձին դաժանությամբ սպանել է իր նախկին մտերմուհուն՝ Մարիամ Դ.-ին:
Առաջադրված մեղադրանքի համաձայն՝ կին ու երեք անչափահաս երեխա ունեցող Կարեն Հ.-ն մտերմացել էր Մարիամ Դ.-ի հետ, և 2015 թվականին ծնվել է նրանց համատեղ դուստրը: Երեխան բնակվել է հոր՝ Կարենի ընտանիքում, իսկ երեխայի մոր՝ Մարիամի հետ եղել են տարաձայնություններ՝ Կարեն Հ.-ն, ըստ մեղադրանքի, խոչընդոտել է երեխայի հետ մոր տեսակցություններին, մասնավորապես՝ 2018 թվականի ապրիլին երեք անգամ առանց հարգելի պատճառի խոչընդոտել է մոր ու 3-ամյա երեխայի հանդիպումներին:
Տարաձայնությունները Մարիամի հետ եղել են շարունակական, և, ըստ մեղադրանքի, 2018 թվականի օգոստոսի 30-ի վաղ առավոտյան՝ ժամը 7-ն անց 33-ի սահմաններում Կարեն Հ.-ն այցելելով Երևանի Արարատյան փողոցի տներից մեկում Մարիամի Դ.-ի վարձակալած բնակարան, դանակի շուրջ 70 հարված հասցնելով, առանձին դաժանությամբ սպանել է նրան, մարմինը ծածկել է ծածկոցով ու հեռացել է:
Կարեն Հ.-ի խափանման միջոցը կալանավորումն է: Նա դատարան է ներկայացվում հաշմանդամի սայլակով՝ հայտարարելով, թե չի կարողանում տեղաշարժվել, իրեն բժշկական հետազոտության չեն ենթարկում, չեն բուժում, ու իր վիճակը չի բարելավվում:
Դատարանը քրեական գործում առկա գրավոր ապացույցների հետազոտման փուլում է:
Քրեական գործը բաղկացած է վեց հատորից:
Հրապարակվեց ՀԿԳ քննիչի զեկուցագիրը իր վարչության պետին այն մասին, որ 2018 թվականի օգոստոսի 30-ի առավոտյան, երբ ինքը զբաղված էր աշխատանքով, իր բջջային հեռախոսին է զանգել իր «կնունքի քավոր» Կարեն Հ.-ն ու խնդրել է, որ շտապ գնա Աբովյան քաղաքում գտնվող նրա տուն: Ինքն ասել է, թե աշխատանքի մեջ է, չի կարող, հարցրել է՝ ի՞նչ է պատահել, Կարեն Հ.-ն չի պարզաբանել, միայն խնդրել է գնալ իրենց տուն: Ինքը պնդել է, թե չի կարող:
Կեսօրից հետո՝ ժամը 14-ն անց 30-ի սահմաններում, Կարենը նորից է զանգել «Վայբերով», ասել է, թե ոստիկանության Քանաքեռ-Զեյթունի բաժնի մոտ է: Ինքն իջել է նրա հետ հանդիպելու և տեսել է, որ Կարեն Հ.-ի ձեռքերը «բինտով» փաթաթված են: Նա հայտնել է, թե իր նախկին ընկերուհի Մարիամը, ումից երեխա ունի,խնդրել էր վաղ առավոտյան տանից վերցնել նրան ու տանել օդանավակայան: Ինքը գնացել է Մարիամի տուն: Երբ երկուսով ցանկացել են դուրս գալ տանից, իրենց վրա են հարձակվել 3-4 անծանոթ տղամարդ: Նրանցից մեկը բռնել է Մարիամին, իսկ մյուսները դանակով հարձակվել են իր վրա: Ինքը բռնել է դանակի շեղբից, վնասել է ձեռքերը և դիմել է փախուստի…
Քննիչն իր զեկուցագրում նշել է, թե հորդորել է, որ Կարենը գնա համապատասխան տարածքի ոստիկանություն, անձամբ ներկայանա ու հայտնի տեղի ունեցածի մասին: Երեկոյան քննիչը փորձել է զանգել Կարենին ու իմանալ՝ գնա՞ց ոստիկանություն, թե՞ ոչ, բայց Կարենի հեռախոսը չի պատասխանել: Որոշ ժամանակ անց քննիչը տեղեկացել է, որ Կարեն Հ.-ին ձերբակալել են:
Կարեն Հ.-ն ոստիկանությունում նույնպես ներկայացրել է վերը շարադրված պատմությունը, նշել է, որ անծանոթ տղամարդկանց կողմից ինքն ու Մարիամը ենթարկվել են հարձակման, ինքը ստացել է վնասվածքներ: Խնդրել է պարզել իրենց վրա հարձակված անծանոթ տղամարդկանց ինքնությունն ու, քանի որ վնասվածքներ ունի, իրեն տալ դատաբժշկի ուղեգիր:
Քրեական գործի առաջին հատորից հրապարակվեցին Մարիամ Դ.-ի տան մուտքի շրջակայքում տեղադրված տեսախցիկների կողմից կատարված տեսագրությունների զննության արձանագրությունները:
Տեսագրող սարքերի տեսադաշտում է եղել Արարատյան փողոցում գտնվող՝ Մարիամ Դ.-ի բնակության վայրի մուտքի դուռը:
Ըստ զննության արձանագրությունների՝ 2018 թվականի օգոստոսի 30-ին, ժամը 7-ն անց 32-ին Արարատյան փողոցի տվյալ հատվածում հայտնվել է կապույտ «Շևրոլե» մեքենա: Մինչ այդ որևէ անձ մուտք չի գործել Մարիամ Դ.-ի տուն: Ժամը 7-ն անց 36-ին Մարիամի տան մուտքի դռանն է մոտեցել կապույտ շապիկով մի տղամարդ, ձախ ձեռքին՝ ինչ-որ առարկա, կանգնել է մուտքի դռան մոտ, շարժվել է դեպի պատուհանը, նորից մոտեցել է մուտքի դռանն ու ներս է մտել:
Դրանից հետո որևէ այլ անձ Մարիամի տուն չի մտել:
Ժամը 9-ն անց 15-ին նույն կապույտ շապիկով տղամարդը ճոճվելով դուրս է եկել Մարիամի տանից, քայլել է Արարատյան փողոցով: Նրա ձախ ձեռքին ինչ-որ առարկա կար, աջ ձեռքով գրպանից ինչ-որ իր է հանել ու անհետացել է տեսախցիկի տեսադաշտից:
Ժամը 9-ն անց 46-ին վերը հիշատակված կապույտ «Շևրոլե» մեքենան հայտնվել է տեսախցիկի տեսադաշտում, ղեկին երևացել է նույն կապույտ շապիկով տղամարդը, հետո մեքենան դուրս է եկել տեսախցիկի տեսադաշտից:
Ժամը 17-ն անց 08-ին Մարիամ Դ.-ի տան մուտքի դռանն է մոտեցել սպիտակ վերնաշապիկով մի տղա: Նա խոսել է հեռախոսով, մտել է տուն: 17.09-ին տղան դուրս է եկել տանից, կանգնել է մուտքի դռան դիմաց, խոսել է հեռախոսով, մոտեցել է տեսախցիկի օբյեկտիվին, ձեռքերով ինչ-որ շարժումներ է արել: Ժամը 17.12-ին մի աղջիկ վազելով մոտեցել է սպիտակ վերնաշապիկով տղային, երկուսով մտել են Մարիամի տուն, դուրս են եկել: Նրանց են մոտեցել երկու կին:
Սպիտակ վերնաշապիկով տղան ձեռքերով խփել է գլխին:
Ժամը 17-ն անց 18-ին տանը մոտեցել է շտապօգնության մեքենան, հետո մոտեցել են ուրիշ մեքենաներ, ոստիկանական համազգեստով մարդիկ են եկել: Սպիտակ վերնաշապիկով տղան գնում-գալիս էր, իսկ շտապօգնության մեքենան հեռացել է…
Զննության են ենթարկվել նույն տան մուտքը տեսադաշտում ունեցող այլ տեսախցիկների տեսագրությունները: Այս անգամ զննությանը մասնակցել է Համլետ Ա.-ն, ով հայտնել է, թե սպիտակ վերնաշապիկով տղան ինքն է…
Նա նշել է, որ օգոստոսի 30-ին ժամը 17-ն անց 08-ին ինքն է մոտեցել Մարիամի տանը՝ եկել էր, որովհետև Մարիամը չէր պատասխանում իր հեռախոսազանգերին: Մտել է ներս ու տեսել է, որ ներքնակն արյունոտ է, հատակին ընկած մարմին կա, որը ծածկոցով ծածկված էր: Մի փոքր հետ է տարել ծածկոցն ու տեսել է, որ ընկածը Մարիամն է…
Ըստ այլ տեսագրությունների զննության արձանագրության՝ Համլետ Ա.-ն Մարիամի տուն էր եկել նաև օգոստոսի 29-ի ուշ երեկոյան: Մարիամը տանը չէր, Համլետը նրան կանչել է հարևանուհու տանից, նրանք միասին մտել են Մարիամի տուն: Գիշերվա ժամը 4-ն անց 22-ին Մարիամի տան մոտ կանգնել է մի մեքենա, Համլետ Ա.-ն հայտնել է, որ դա իր կանչած տաքսին էր: Նա դուրս է եկել Մարիամի տանից, նստել է տաքսի ու հեռացել է:
Դրանից հետո, մինչև առավոտյան ժամը 7-ն անց 32-ին կապույտ շապիկով տղամարդու մուտք գործելը, Մարիամի տուն այլևս ոչ ոք մուտք չի գործել՝ ըստ տեսագրությունների զննության արձանագրության:
Զննությանը մասնակցած, գործով վկայի կարգավիճակ ստացած Համլետ Ա.-ն հայտնել է, որ կապույտ շապիկով տղամարդը Կարեն Հ.-ն է՝ Մարիամի նախկին ընկերը, ումից Մարիամը երեխա ուներ, երեխան ապրում է հոր հետ: Համլետ Ա.-ն հայտնել է, թե Կարենին տեսել է Մարիամի մոտ եղած լուսանկարներում, ինչպես նաև սոցցանցերում եղած լուսանկարներում:
Հրապարակվեց Կարեն Հ.-ի՝ Աբովյանում գտնվող տանից առգրավում կատարելու արձանագրությունը: Կարենի կինը հանձնել է նախորդ օրը Կարենի հագին եղած հագուստը՝ կապույտ շապիկ ու հնամաշ կապույտ տաբատ: Կինը հայտնել է, թե ամուսինը այդ շորերեով է նախորդ օրը տուն եկել, ինքը լվացքի մեքենայով լվացել է այդ հագուստը, որն արյունոտ չի եղել: Հետո կինը հավելել է, որ տաբատի ծնկին մի փոքր հատված արյունոտվել էր, երբ ամուսինը վնասված ձեռքը դրել էր ծնկին… Հագուստը փաթեթավորվել և առգրավվել է:
Խուզարկություն է կատարվել Կարեն Հ.-ի մեքենայում, կատարվել է կասկածելի հետքերի առգրավում:
Կատարվել է առգրավում՝ ՁՊՎ-ում գտնվող Կարեն Հ.-ի սավանն ու բարձի երեսն են առգրավվել, որոնց վրա առկա են եղել արնանման հետքեր: Առգրավման արձանագրության մեջ նշված էր, թե տվյալ խցում Կարեն Հ.-ն մենակ էր, սավանն ու բարձի երեսը նրան էին տրամադրված:
Այս փաստաթղթի հրապարակումից հետո Կարեն Հ.-ն հայտարարեց, թե ՁՊՎ-ում իրեն անկողին չի տրամադրվել, ինքը անկողնում չի քնել, չգիտի՝ ինչ անկողնու մասին է խոսքը:
Հրապարակվեց Կարեն Հ.-ի բնութագիրը՝ տրված բնակության վայրից: Նշված էր, որ Կարեն Հ.-ի խնամքին են չորս անչափահաս երեխաները՝ 16, 15, 13 և 4 տարեկան: Վերջին երեխան տուժող Մարիամ Դ.-ի ու Կարեն Հ.-ի դուստրն է: Կարենի խնամքին են նաև կինն ու վատառողջ մայրը: Ըստ բնութագրի՝ Կարենն է ընտանիքի միակ կերակրողը: Նա բնութագրվել է որպես «հարևանասեր, բարյացակամ, կիրթ ու բարեհամբույր մարդ», նրա մասնակցությամբ հակահասարակական «երևույթներ» «չեն նկատվել», թաղային լիազորությունը նրան բնութագրել է «դրականօրեն»:
Ըստ քրեական գործում առկա փաստաթղթերի՝ Կարեն Հ.-ն ծառայել է բանակում:
Հրապարկվեցին բժշկական փաստաթղթեր, համաձայն որոնց՝ Կարեն Հ.-ն ունեցել է առողջական խնդիրներ՝ ճնշման ու սրտի հետ կապված:
Հրապարակվեց արձանագրություն՝ զննություն կատարելու մասին՝ ՁՊՎ-ում գտնվող Կարեն Հ.-ի մարմինը զննվել, ու վնասվածքներ են հայտնաբերվել ձեռքերի շրջանում՝ սալջարդ վերք, քերծվածքներ, կտրած վերքեր:
Ըստ դատաբժշկական փորձաքննության եզրակացության՝ հիշյալ վնասվածքներով Կարեն Հ.-ի առողջությանը պատճառվել է թեթև վնաս՝ առողջության կարճատև քայքայումով: Նշվել է, որ քերծվածքները կարող էին պատճառվել մարդկային եղուգներով՝ քաշքշուկի կամ ճանկռոտելու արդյունքում: Ձեռքերի մատների ու ափի կտրած վերքերը պատճառվել են սղոցանման եզր ու սուր եզր ունեցող առարկաներով…
Կարեն Հ.-ն հայտարարեց. «Ուզում եմ արդար լինի ամեն ինչ…»: Ապա նախագահողին դիմելով՝ շարունակեց. «Ձեր կողմից դեռ անարդարություն չեմ տեսել, բայց մինչև ձեզ շատ եմ տեսել…»:
Դատական հաջորդ նիստին՝ նոյեմբերի 8-ին, դատարանը կշարունակի քրեական գործում առկա գրավոր փաստաթղթերի հրապարակումն ու հետազոտումը: