Սիրիայի Բարիշա գյուղի բնակիչները Աբու Բաքր ալ-Բաղդադիին ՝ «ամերիկացիների սպանած թիվ մեկ ահաբեկչին», ճանաչում էին որպես կտորեղենի հասարակ վաճառող: Այս մասին գրում է թուրքական Daily Sabah թերթը:
Հրապարակման համաձայն՝ ԻՊ խմբավորման առաջնորդը կյանքի վերջին ամիսներն անցկացրել է ընտանիքի հետ՝ ապրելով գյուղի ծայրամասում գտնվող պարսպապատ մեծ տանը: Տեղացիներին ներկայացել է Աբու Մուհամմադ Հալաբի անունով։ Բոլորի հետ քաղաքավարի է եղել, բայց ծածկամիտ: Գյուղացիները ենթադրում էին, թե նա գաղթական է, որը տեղափոխվել է Սիրիայի հյուսիս և ցանկանում է ընտանեկան բիզնես հիմնել:
Լրագրողները ահաբեկչի վերացման ականատեսների գտան: Նրանք պատմեցին, որ գործողությունն ինքնին տևել է ավելի քան չորս ժամ, և ամերիկյան զորքերը, իբր, անկանոն «կրակել են փողոցում գտնվող բոլոր մարդկանց վրա»: Հրաձգությունից շատ շենքեր են վնասվել, իսկ ալ-Բաղդադիի տունը ավերվել է անօդաչու սարքերի հարվածներից: