Լուրեր
Գազի գինը կախված է նրանից, թե ինչ չափով Պուտինը կցանկանա «պատժել» Հայաստանին
  • 10:00
  • 2019-10-31
  • Դիտումներ՝ *

ՀՀ վարչապետ Նիկոլ Փաշինյանը օրերս «Կոմերսանտ»-ին տված հարցազրույցում ի թիվս այլ հարցերի՝ անդրադարձել էր նաև Հայաստանին մատակարարվող գազի սակագնի շուրջ Ռուսաստանի հետ տարվող  բանակցություններին։ Վարչապետը վստահություն էր հայտնել, որ ռազմավարական դաշնակիցների միջև բանակցությունները հստակ արդյունքների կհագեցնեն և որոշումը կլինի դաշնակցային։

Այս համատեքստում  Փաշինյանը  մասնավորապես նշել էր․

«Կարծում եմ, որ մեր ռազմավարական  դաշնակցի՝ Ռուսաստանի համար կարևոր է, որ գազի գինն այնպիսին լինի, որ չկոտրի Հայաստանի  Հանրապետության տնտեսական զարգացման դինամիկան։ Մեզ համար կարևոր է, որ «ԳազպրոմԱրմենիա»-ի գործերը կարգին լինեն, և մենք պետք է այնպիսի բանաձևեր մշակենք, որ և´ «ԳազպրոմԱրմենիա»-ի գործունեությունն արդյունավետ լինի, և´ գազի գինն արդյունավետ լինի»։

Տնտեսագետ Մովսես Արիստակեսյանը համոզված է, որ այս բանակցությունները տնտեսագիտական բովանդակություն, տնտեսական որևէ հիմնավորում չունեն։  Ըստ նրա՝ դրանք  լոկ քաղաքական բանակցություններ են։

«Կանխատեսումներ չեմ կարող անել, թե քանի տոկոսով Վլադիմիր Պուտինը կցանկանա թանկացնել  գազը, դա կախված է նրանից, թե  նա ինչ չափով կցանկանա «պատժել» Հայաստանին կամ Նիկոլ Փաշինյանին։

Արդեն շուրջ  մեկուկես  տարի է, որ այս բանակցություններն ընթանում են և դրանք որևէ արդյունք չեն տալիս, որը  Ռուսաստանի ոչ գործընկերային արձագանքն է  ինքնիշխան  Հայաստանի լեգիտիմ  վարչապետի արժանապատիվ կեցվածքին։ Կարծում էի, որ թավշյա հեղափոխությունից հետո նոր իշխանությունները, այս կառավարությունը՝ վարչապետ Փաշինյանի գլխավորությամբ պետք է մշակեին կոնկրետ քաղաքականություն  Ռուսաստանից էներգետիկ կախվածությունն էականորեն թուլացնելու համար, և գազի գինը մեր գլխին որպես մահակ ճոճելու Ռուսաստանի և «Գազպրոմ»-ի քաղաքականությանը դիմագրավելու համար,  սակայն նրանք բավարարվում են բանակցություններով, որոնք կրկնում եմ՝ ընթանում են ո´չ տնտեսագիտական հիմնավորումներով և ո´չ  էլ Ռուսաստանի կողմից ռազմավարական դաշնակցի  ստանձնած պարտավորություններով»,-«Առաջին լրատվական»-ի հետ զրույցում շեշտեց Մովսես Արիստակեսյանը։

 

Մանրամասները՝ տեսանյութում։

  • Դիտումներ՝ *