Երեկ ԱՄՆ Ներկայացուցիչների պալատը, ձայների գերակշիռ մեծամասնությամբ, ընդունեց Հայոց ցեղասպանությունը ճանաչող թիվ 296 բանաձևը։ Օրենսդիր մարմնի երկու ճամբարների՝ հանրապետականների և դեմոկրատների հեղինակած թիվ 296 բանաձևն ընդունվեց 405 կողմ, 11 դեմ ձայներով։ Փաստաթուղթը, որն օրենքի պարտադիր ուժ չունի, արձանագրում է՝ ԱՄՆ կառավարությունը պետք է պաշտոնապես ճանաչի և ոգեկոչի Հայոց ցեղասպանությունը, չմասնակցի այդ փաստի ժխտմանը և խրախուսի Հայոց ցեղասպանության հանրային ըմբռնմանը։
Մինչ պաշտոնական Երևանը՝ ՀՀ վարչապետ Նիկոլ Փաշինյանն ու արտգործնախարար Զոհրաբ Մնացականյանը ողջունել են բանաձևի ընդունումը, պաշտոնական Անկարան դատապարտել է Հայոց ցեղասպանությունը ճանաչող բանաձևի ընդունումը ԱՄՆ Ներկայացուցիչների պալատի կողմից և պնդել, թե ձայների գերակշիռ մեծամասնությամբ ընդունված որոշումը «ոչ մի նշանակություն չունի Թուրքիայի ժողովրդի և կառավարության համար»։ Թուրքիայի արտգործնախարարությունը այդ երկրում ԱՄՆ դեսպան Դեյվիդ Սաթերֆիլդին կանչել է բացատրություն տալու։ Թուրքիայի արտաքին քաղաքական գերատեսչությունը հայտարարել է, թե մերժում է «ներքաղաքական նպատակներով ընդունված՝ պատմական ու իրավական հիմք չունեցող այս որոշումը»։
ՀՀ Գերագույն խորհրդի և ԱԺ նախկին պատգամավոր, մի շարք երկրներում ՀՀ նախկին դեսպան, փիլիսոփա Աշոտ Ոսկանյանը «Առաջին լրատվական»-ի հետ զրույցում կարծիք հայտնեց, որ բանաձևի ընդունումն ինքնին բարենպաստ քայլ է մեզ համար, որովհետև դրանից հետո մի քանի քայլ է մնում անելու։
«Եվ եթե ԱՄՆ-ն վերջնականապես ճանաչի ցեղասպանությունը, կարող ենք գործնականում միջազգային ճանաչման պրոցեսը համարել ավարտված։ Բայց միևնույն ժամանակ մենք պետք է հասկանանք, որ այդ արդյունքին մենք հասել ենք այն պատճառով, որ խիստ լարված են հարաբերությունները ԱՄՆ-ի և Թուրքիայի միջև։ Եվ դա ամենավճռական դերն է խաղացել»,- ասաց Աշոտ Ոսկանյանը։
Մեր դիտարկմանը, թե արդյոք կարո՞ղ է շարժ արձանագրվել հայ-թուրքական հարաբերություններում, Աշոտ Ոսկանյանն արձագանքեց, որ այդ բանաձևը չի կարող ազդել հայ-թուրքական հարաբերությունների վրա՝ դրական կամ բացասական ձևով։
«Դա վերաբերում է մեծ քաղաքականության ոլորտին։ Դա պետք է առաջ շարժվելու համար, բայց պետք է շատ զգույշ և զգոն լինենք՝ իմանալով, որ դա ոչ թե բարոյական խնդրի լուծում է, այլ որպես մեծ քաղաքականության համատեքստում կատարված քայլ, որը տվյալ պահին մեզ համար բարենպաստ է»,- ասաց մեր զրուցակիցը։
Նկատեցինք, որ Թուրքիան բավականին կոշտ է արձագանքել բանաձևի ընդունմանը։
«Թուրքիայի կոշտ արձագանքներն էլ են վերաբերում ԱՄՆ-ին, և ավելի շատ հռետորաբանություն են։ Թուրքերը շատ լավ հասկանում են, որ դա ամենից առաջ ԱՄՆ-ի որոշումն է, ոչ թե հայերի կողմից դրդված որոշում»,- նշեց Աշոտ Ոսկանյանը։
Այնուամենայնիվ, այդ բանաձևի ընդունումը դուռ չի՞ բացի հայ-թուրքական հարաբերությունները վերսկսելու համար։
Աշոտ Ոսկանյանը հակադարձում է՝ կարծում եմ, որ ոչ։ Ըստ նրա՝ ներկա թուրքական քաղաքականությունը պատրաստ չէ հարաբերությունների կարգավորմանը։
«Ես կարծում եմ, որ դա լոկալ քայլ է, և պետք չէ այդքան հեռու գնալ»,- ասաց մեր զրուցակիցը։
