Իսրայելի նշանավոր քաղաքական գործիչներից երկուսը երկրի իշխանություններին կոչ են արել ճանաչել Հայոց ցեղասպանությունը՝ հետևելով ԱՄՆ ներկայացուցիչների պալատի օրինակին: Այս մասին հաղորդում է The Times of Israel-ը:
Ինչպես նշում է պարբերականը՝ հոկտեմբերի 29-ին ԱՄՆ ներկայացուցիչների պալատում 405 կողմ, 11 դեմ ձայներով Հայոց ցեղասպանության ճանաչման բանաձևի ընդունումից հետո հնչել են ողջույններ ու ծափահարություններ:
Իսրայելական անգլալեզու օնլայն թերթի հոդվածագիրը նկատում է, որ հոկտեմբերի 29-ը, երբ Թուրքիան նշում է Հանրապետության օրը, այսուհետ կմնա պատմության մեջ նաև ԱՄՆ Ներկայացուցիչների պալատում Թուրքիայի դեմ երկու նախագծերի ընդունմամբ. մյուսը այդ երկրի նկատմամբ պատժամիջոցների կիրառման օրինագիծն էր: Այս ամենը տեղի էր ունենում Թուրքիայի կողմից Սիրիայի հյուսիսարևելյան հատված ներխուժումից և այդ տարածքներն իրենց վերահսկողության տակ վերցրած քրդերի վրա հարձակումից երեք շաբաթ անց:
