Վատիկանում միաստվածական աբրահամյան կրոնների (հրեականության, քրիստոնեության և իսլամի համար ընդհանուր անվանում) ներկայացուցիչները ստորագրել են համատեղ հռչակագիր կյանքի վերջի մասին: Այս մասին տեղեկացնում է Վատիկանի Ռադիոն:
Նշվում է, որ փաստաթղթի մշակման գաղափարը պատկանում է Կենսաէթիկայի հարցով իսրայելական ազգային խորհրդի համանախագահ Աբրահամ Շտեյնբերգին:
«Էվթանազիան և ինքնասպանությունը բժշկական աջակցությամբ համարվում են սխալ բարոյականության ու կրոնական տեսանկյունից և պետք է արգելվեն առանց բացառության: Ոչ մի բժիշկ չպետք է հարկադրված կամ ճնշման ենթարկվելով ուղիղ կամ կողմնակի կերպով մասնակից լինի հիվանդի կամավոր կամ կանխամտածված մահվան»,- ասվում է փաստաթղթում:
Բժիշկները և հանրությունը, նշվում է հռչակագրում, պետք է հարգեն «մահացող հիվանդի՝ իր կյանքը երկարաձգելու և պաշտպանելու ցանկությունը, թեկուզ կարճ ժամանակով»՝ օգտագործելով բուժման համապատասխան մեթոդներ:
Միաստվածական աբրահամյան կրոնները հանդես են գալիս ընդդեմ էվթանազիայի և ինքնասպանության ցանկացած ձևի՝ բժշկական աջակցությամբ, քանի որ դա լիովին հակասում է «մարդկային կյանքի արժեքներին» և բացարձակապես անընդունելի է բարոյականության և կրոնական տեսանկյունից: Բոլոր մահացողները պետք է երաշխավորված լինեն կրոնական օգնությամբ՝ ընդգծվում է փաստաթղթում:
