«Իրավիճակը վկայում է, որ կա խոր հակադրություն և, կարելի է ասել, քաղաքական ճգնաժամ Սահմանադրական դատարանի շուրջ։ Իմ կարծիքով՝ այս խնդիրը կարիք ունի քաղաքական կարգավորման և ես հուսով եմ, որ հակառակորդ կողմերը իրենց մեջ ներուժ կգտնեն գտնել քաղաքական լուծում»,- «Առաջին լրատվական»-ի հետ զրույցում նման կարծիք հայտնեց քաղաքագետ Անդրիաս Ղուկասյանը՝ անդրադառնալով Սահմանադրական դատարանի շուրջ ստեղծված իրավիճակին, Հրայր Թովմասյանի դեմ հարուցված քրեական գործերին։
Մեր զրուցակիցն ընդգծեց. «Խնդիրը ոչ միայն Սահմանադրական դատարանինն է, այլ վերաբերում է առհասարակ երկրում ստեղծված քաղաքական իրավիճակին, միջազգային հանրությունը ևս հետևում է այս իրավիճակին։ Երբ նման աստիճանի հակադրություն է գնում, երկրի ընդհանուր վարկանիշը դրանից միանշանակ չի բարձրանում։ Ընդհակառակը՝ նման իրավիճակը կարող է բացասական անդրադառնալ մեր երկրի միջազգային վարկանիշի վրա»։
Միևնույն ժամանակ Ղուկասյանը շեշտեց՝ իրավական գործընթացները պետք չէ քաղաքական գործընթացների հետ խառնել, բայց երբ այսպիսի հակադրություն կա՝ ժամանակն է, որ կողմերը գտնեն քաղաքական լուծում։
Ըստ մեր զրուցակցի՝ սա ընդհանուր նախկին համակարգի ապամոնտաժման գործընթաց է. «Ես համարում եմ, որ ոչ թե սա Հրայր Թովմասյանի խնդիրն է, այլ ավելի լայն խնդիր է, այդ պատճառով էլ գտնում եմ, որ պետք է քաղաքական լուծում»։
Մեր այն դիտարկմանը, թե Հրայր Թովմասյանը հայտարարել է, որ պաշտոնավարելու է մինչև իր լիազորությունների ավարտը, և ճգնաժամի հանգուցալուծումը այս կոնտեքստում չի նշմարվում, Ղուկասյանն արձագանքեց. «Այս ճգնաժամը կապված է նրա հետ, որ Հրայր Թովմասյանը դիմեց Մարդու իրավունքների պաշտպանության եվրոպական դատարանին, Վենետիկի հանձնաժողովին, որպեսզի ստանա այդ միջազգային դատական ու փորձագիտական կառույցների եզրակացությունը՝ Ռոբերտ Քոչարյանի հետ կապված գործով՝ մասնավորապես, արդյոք այդ հոդվածը՝ 300.1-ը, որը մեղսագրվում է Քոչարյանին, կարող է դրան մեղսագրվել, որովհետև այն 2009 թվականին է ընդունվել, կարո՞ղ է այդ նորմը հետադարձ ուժ ունենալ, թե՞ ոչ։ Այստեղ է պետք հասկանալ, թե ինչ իրավիճակ է ստեղծվում, և ինչ են կողմերի սպասելիքները»։
