Իրաքցի հովիվները անապատում թաքստոց են հայտնաբերել, որտեղ «Իսլամական պետություն» ահաբեկչական կազմակերպության զինյալները փող և արժեքավոր իրեր են թաքցրել: Mirror-ի փոխանցմամբ, այս մասին հաղորդել է Մուհամեդ Ալի Սաջեթը, որը համարվում է սպանված ԻՊ առաջնորդ Աբու Բաքր ալ-Բաղդադիի ամենամոտ զինակիցներից մեկը:
Նրա խոսքերով, այնտեղ գրեթե 25.7 միլիոն ԱՄՆ դոլար արժողությամբ կանխիկ գումար, ոսկի և արծաթ է պահվել: Այնուամենայնիվ, չնայած լավ մտածված ծրագրին, ջիհադիստները կորցրել են թաքստոցը, որը հայտնաբերել են հովիվները, ասել է Սաջեթը:
Ինչպես հայտնել է Al Arabiya հեռուստաալիքը, Սաջեթին բռնել է իրաքյան հետախուզությունը: Այն բանից հետո, երբ Միացյալ Նահանգները հայտարարեց Սիրիայում ռազմական գործողության ընթացքում Ալ-Բաղդադիի վերացման մասին, հեռուստաալիքը հարցազրույց է հրապարակել «Իսլամական պետության» առաջնորդի զինակցի հետ: Հարցազրույցի ընթացքում Սաջեթը խոսել է այդ գանձերի մասին՝ նշելով, որ դրանք գտնվել են Իրաքի Անբար նահանգում գտնվող անապատում:
Այս շրջանը սահմանակից է Սիրիայի, Հորդանանի, Սաուդյան Արաբիայի հետ և հանդիսանում է այսպես կոչված սուննի եռանկյունու մաս՝ տարածք, որտեղ գերակշռում է սուննի արաբ բնակչությունը: Այս տարածքը Սիրիայում և Իրաքում պարտությունից հետո դարձել էր ԻՊ-ի զինյալների հիմնական ապաստարաններից մեկը: