Բրիտանական BBC-ն դեկտեմբերի 29-ին անդրադարձել է Առաջին համաշխարհային պատերազմի ժամանակ Օսմանյան կայսրությունում հայերի նկատմամբ իրականացված ցեղասպանությանը, ընդգծելով, որ հայերի զանգվածային ջարդը շարունակում է մնալ ամենազգայուն թեմաներից մեկը:
«Մինչ պատմաբանները շարունակում են այդ հարցի շուրջ քննարկումները, Թուրքիան դիմադրում է ու չի ցանկանում 1915-1916 թվականներին տեղի ունեցած ջարդերը անվանել ցեղասպանություն: Այդ թվականներին բազմաթիվ հաղորդագրություններ կան հայերի նկատմամբ թուրքերի կողմից իրականացված վայրագությունների մասին»,- գրում է BBC-ն: «Փաստ է, որ հարյուր հազարավոր հայեր են մահացել 1915-1916 թվականներին, երբ օսմանյան թուրքերը հայերին Արևելյան Անատոլիայից արտաքսեցին դեպի Սիրիայի անապատ, որտեղ էլ նրանք մահացան կամ սովից, կամ հիվանդություններից: Մահացած հայերի թիվը վիճահարույց է կողմերի համար. Հայաստանը պնդում է` 1.5 մլն հայ է մահացել, Թուրքիայի գնահատկաններով` այն մոտ 300 հազար է: Ըստ ցեղասպանագետների միջազգային ասոցիացիայի` զոհերի թիվը «մեկ միլիոնից ավելի է»:
2005 թվականին Ասոցիացիայի կողմից Թուրքիայի վարչապետ Ռեջեփ Թայիփ Էրդողանին ուղղված նամակում ասված է. «Մենք ընդգծում ենք, որ մեր գնահատականները ոչ թե հայերի պնդման վրա է հիմնված, այլ ցեղասպանությունը ուսումնասիրող գիտնականների կարծիքի վրա»: Այնուհետև BBC-ն անդրադառնում է 1948թ-ի դեկտեմբերի 9-ին, Միավորված ազգերի կազմակերպության ընդունած` «Ցեղասպանության հանցագործության կանխման և դրա համար պատժի մասին» կոնվենցիային, ըստ որի` ցեղասպանությունը սահմանվում է որպես միջազգային հանցագործություն և ստորագրող պետությունները պարտավորվում են կանխել, ինչպես նաև պատժել ցեղասպանություն իրականացնողներին:
«Հայ ժողովուրդը, ինչպես նաև շատ պատմաբաններ ու երկրների կառավարություններ վստահ են, որ 1915 թվականին իրականացվածը կանխամտածված է եղել, բայց շատ այլ գիտնականներ հարցականի տակ են դնում այդ տեսակետը: Ծագումով հրեա փաստաբան Ռաֆայել Լեմկինը, ով 1943 թվականին շրջանառության մեջ դրեց «ցեղասպանություն» եզրը, հրեական հոլոքոստին վերաբերող ուսումնասիրություններում անդրադարձել է նաև հայերի նկատմամբ իրականացված կոտորածներին:
Թուրք պաշտոնյաներն ընդունում են, որ վայրագություններ են կատարել, սակայն պնդում են, որ քրիստոնյա հայերին ոչնչացնելու կանխամտածվածություն չեն ունեցել»,- գրում է BBC-ն` նշելով նաև այն պետությունները, որոնք մինչ օրս պաշտոնապես ճանաչել են Հայոց ցեղասպանությունը:
Եվրոպական խորհուրդն ու ՄԱԿ-ի` «Խտրականության կանխարգելման ու փոքրամասնությունների պաշտպանության» հանձնաժողովը նույնպես ճանաչել են Հայոց ցեղասպանությունը:
«Մեծ Բրիտանիան, ԱՄՆ-ն ու Իսրայելը այն երկրների շարքում են, որոնք տարբեր եզրեր են օգտագործել տեղի ունեցածը նկարագրելու համար: Ֆրանսիայի Ազգային ժողովը 2011 թվականի դեկտեմբերին ընդունեց Հայոց ցեղասպանության ժխտումը քրեականացնող օրինագիծը, որը նախատեսում է Ֆրանսիայում Հայոց ցեղասպանությունը ժխտողներին 1 տարվա ազատազրկում և 45 հազար եվրո տուգանք»,- հաղորդում է BBC-ն` ընդգծելով, որ դրա հետևանքով Թուրքիան սառեցրեց Ֆրանսիայի հետ քաղաքական այցերն ու ռազմական համատեղ ծրագրերը: Անդրադառնալով հայ-թուրքական հարաբերությունների կարգավորմանն ուղղված գործընթացներին, BBC-ն գրում է, որ 2009 թվականի արձանագրությունը դեռ պետք է հաստատվի երկու երկրների խորհրդարանների կողմից: «Հարցը բարդացնող հիմնական խնդիրը կապված է Լեռնային Ղարաբաղի սառեցված հակամարտության հետ. Թուրքիան աջակցում է Ադրբեջանին ` պնդելով որ 1990-ական թվականներին տեղի ունեցած պատերազմի ժամանակ էթնիկ հայերը «գրավել» են Ադրբեջանի տարածքը»: