Այս օրերին Ազգային ժողովում քննարկվում է 2020 թվականի բյուջեի նախագիծը։ Այս և այլ թեմաների շուրջ զրույցի համար «Առաջին լրատվական»-ը հյուրընկալել էր ՀՀ վարչապետի խորհրդական Մեսրոպ Առաքելյանին։
«Գազի գնի հետ կապված հարցը բաժանենք երկու մասի․ մեկը այն, որ Հայաստանի Հանրապետությունը Ռուսաստանից ձեռք է բերում գազ, որը ձեռք է բերում «Գազպրոմ Արմենիա» ընկերությունը ռուսական «Գազպրոմ» ընկերությունից, և երկրորդը՝ այն գինը, որ վճարում է սպառողը Հայաստանի Հանրապետության տարածքում։ Ակնհայտ է, որ սպառողին հետաքրքրում է այն գինը, որը նա է վճարում։ Հետևաբար, այս հարցը պետք է նայել այդ երկու կոմպոնենտը համատեղ։ Ամեն դեպքում՝ արվելու է առավելագույնը, որպեսզի Ռուսաստանից ձեռք բերված գազի գինը սպառողի վրա փոքր ազդեցություն ունենա, կամ ընդհանրապես չունենա։ Այս պահին բանակցությունները շարունակվում են, և չեմ կարող ասել՝ երբ է հնարավոր փոփոխությունները և ինչ տեսքով։ Հետագայում մենք ամեն ինչ պետք է անենք, որպեսզի գազից կախվածությունը շատ քիչ լինի»,- «Առաջին լրատվական»-ի հետ զրույցում ասաց ՀՀ վարչապետի խորհրդական Մեսրոպ Առաքելյան։
«Բյուջեի նախագծի քննարկման հիմնական դժգոհությունը, մտահոգությունը կապված է ավելի շատ տնտեսական աճի ցուցանիշի հետ, որ ընդամենը 4,9 տոկոս է ամրագրված։ Սակայն նշեմ, որ բյուջեի կարևորությունը պետք է դիտարկել ոչ թե մակրոտնտեսական ցուցանիշների տեսանկյունից, այլ թե որքանով է այդ բյուջեն արդյունավետ ծախսվում և որքանով է այդ բյուջեն ծառայում քաղաքացուն, նրա բարեկեցությանը։ Մենք ունեցել ենք երկնիշ թվերով տնտեսական աճեր, բայց այդ թվերն այդքան էլ կարևոր չեն քաղաքացու համար։ Քաղաքացու համար կարևոր է, թե արդյոք նա լավ է ապրելու։ Այնպես որ, չեմ ուզում կենտրոնանալ զուտ այդ մակրոտնտեսական թվերի վրա, որոնք, ի վերջո, ընթացքում կարող են փոփոխվել՝ տարբեր գործոններից ելնելով»,- հավելեց Մեսրոպ Առաքելյանը։
Մանրամասները՝ տեսանյութում։
