Հատուկ քննչական ծառայությունը Հրայր Թովմասյանի՝ օրինախախտումներով ՍԴ նախագահ դառնալու արդեն հայտնի գործով մեղադրանք է առաջադրել ԱԺ նախկին նախագահ Արա Բաբլոյանին: Խափանման միջոց է ընտրվել ստորագրությունը չհեռանալու մասին։ Այդ գործով արդեն կալանավորված է նաև ԱԺ աշխատակազմի նախագահի նախկին տեղակալ Արսեն Բաբայանը: Ո՞ւր է տանում իրադարձությունների այս ընթացքը:
Թեմայի շուրջ «Առաջին լրատվական»-ի հետ քննարկմանը մասնակցեցին քաղաքագետ Վլադ Հովհաննիսյանը, վերլուծաբաններ Հակոբ Բադալյանը և Կարպիս Փաշոյանը:
«Ճնշումը մեծացվում է, Հրայր Թովմասյանի շուրջ օղակն ավելի է սեղմվում. նոր քրեական գործեր են հարուցվել, որոնք վերաբերում են նրա գործունեությանը նախկին կարգավիճակում՝ որպես արդարադատության նախարար: Այս ամենը ամիսներ շարունակվող դիմակայության հերթական զարգացումն է. այս դիմակայությունը չեմ գնահատում որպես լոկալ, այլ համարում եմ հետհեղափոխական գործընթացների մի մասը, որտեղ լուծվում են խնդիրներ, և այդ միջոցով փորձ է արվում խնդիրներ լուծել նաև ոչ միայն ներքին, այլ նաև արտաքին տիրույթներում»,- նշեց Հակոբ Բադալյանը:
«Այս գործընթացը չափից դուրս անձնավորվել է, նույնիսկ անցել ենք մի ռուբիկոն, որից հետդարձ չկա,- ընդգծեց Վլադ Հովհաննիսյանը՝ հավելելով, որ ստեղծվել է մի իրավիճակ, որ Հայաստանում արդարադատության, դատական համակարգի կայացումը կախված է նրանից, թե Հրայր Թովմասյանը հրաժարական կտա, թե ոչ»: Քաղաքագետի խոսքով՝ հնարավորություն կար անցումային արդարադատության ճանապարհով գնալ և շեշտն ինստիտուտների վրա դնել և ոչ թե ֆիքսվել անձանց վրա:
Կարպիս Փաշոյանի դիտարկմամբ՝ իշխանությունն ամեն ինչ երկարացնում է, բարդացնում՝ փոխանակ կտրուկ քալեր ձեռնարկելու: «Խնդիրը համարձակության բացակայության մեջ է: Իշխանությունը վախենում է այս հարցով գնալ կտրուկ գործողությունների, և խնդիրը ավելի է բարդանում, ստեղծվել է իրավիճակ, որտեղ պետության ամբողջ օրակարգը պտտվում է մեկ մարդու՝ Հրայր Թովմասյանի շուրջ: Կարելի էր ամեն ինչ ավելի արագ և կտրուկ անել և հիմա այլ օրակարգ կունենայինք և այլ գործընթացներ տեղի կունենային: ՀՀ-ն չի կարող զարգանալ առանց անկախ և ազատ դատական համակարգի, իսկ Հրայր Թովմասյանը խոչընդոտ է անկախ և ազատ դատական համակարգ ստեղծելու ճանապարհին»,- նշեց վերլուծաբանը՝ հավելելով, որ հեղափոխությանը պետք է հաջորդեին հեղափոխական տրամաբանությամբ գործողություններ, և ԱԺ-ի ձևավորմանը զուգընթաց, շատ արագ պետք է լուծվեր դատական համակարգի հարցը, որպեսզի ամեն ինչ այսքան չբարդանար: Կ. Փաշոյանը նաև ընդգծեց, որ ստեղծվել է զավեշատլի իրավիճակ. «Ստացվում է, որ Սերժ Սարգսյանի հեռացումը և ԱԺ-ն ցրելն ավելի հեշտ էր, քան Հ. Թովմասյանին հեռացնելը»:
Հակոբ Բադալյանի դիտարկմամբ՝ նախկին համակարգը փորձում է պահել իր դիրքերը, փորձում է կռիվ տալ ընդդիմադիր դաշտում, այդ թվում նաև Արա Բաբլոյանի, Հայաստանի առաջին վարչապետի հետ, որը կարծես թե փակել է քաղաքական կենսագրության էջը,- նշեց Հակոբ Բադալյանը՝ հավելելով, որ Վազգեն Մանուկյանը խնդիր չէ իշխանության համար, չպետք է հանրությանը անընդհատ վախեցնել սպառնացող վտանգներով: Վերլուծաբանի կարծիքով՝ այս ամենը սպասելի էր, և իշխանությունը պետք է ունենա իր պատասխանն այս ամենին:
Վլադ Հովհաննիսյանը հավելեց, որ Վազգեն Մանուկյանը 96թ-ից հետո իրեն, որպես քաղաքական ռեսուրս, ամբողջությամբ սպառել է: «Հայաստանում եթե իշխանափոխության փորձը չի հաջողվում, այդ շարժման առաջնորդ քաղաքական գործիչը միանգամից վերածվում է զրոյի»,- նշեց քաղաքագետը:
Կարպիս Փաշոյանը կարծիք հայտնեց, որ Հանրային խորհուրդը ստեղծվել է որպես նվեր Վազգեն Մանուկյանի համար: Քննարկման մասնակիցների դիտարկմամբ՝ այդ կառույցը պետք է վերանա:
Մանրամասն՝ տեսանյութում:
