Լուրեր
Հայտարարություն ոչնչի մասին․ ԱԱԾ-ն դեմք չունի և սպասում է թե քաղաքական ղեկավարությունը ինչ ցուցում կտա
  • 18:15
  • 2019-10-29
  • Դիտումներ՝ *

«Եթե անհրաժեշտություն եղավ, իսկ այս գործում անհրաժեշտություն հաստատ կլինի, ԱԱԾ-ն կձեռնարկի միջոցներ Հոկտեմբերի 27-ի գործով»,- լրագրողների հետ զրույցում հայտարարել է ԱԱԾ պետի ժամանակավոր պաշտոնակատար Էդուարդ Մարտիրոսյանը: Թեմայի շուրջ զրուցելու համար «Առաջին լրատվական»-ը հյուրընկալել է քաղաքագետներ Սարո Սարոյանին և Արմեն Հովհաննիսյանին:

Սարո Սարոյանը նշեց, որ խնդիրն ունի երկու բաղադրիչ՝ քաղաքական և իրավական. «Իրավականի հետ կապված բոլորս հասկանում ենք, որ երևան եկած հանգամանքներ են անհրաժեշտ, որպեսզի իրավական գործընթաց սկսվի: Իսկ քաղաքական առումով հարցը երբեք էլ չի մարել. քաղաքական մեծ բաց կա՝ մեր հանրությունը համոզված չէ, որ բոլոր մեղավորներն են պատժվել, հարց է՝ այլ կազմակերպիչներ եղե՞լ են, թե՞ ոչ, կամ եղե՞լ են արդյոք այլ կատարողներ՝ չհաշված այն, որ կասկածներ կան նաև արտաքին ուղղվածության հետ կապված»:

Նրա խոսքով՝ ԱԱԾ տնօրենի պաշտոնակատարի հայտարարությունը հայտարարություն է ոչնչի մասին. «Այդ կառույցը որևէ դեմք չունի և սպասելու է, թե քաղաքական ղեկավարությունը ինչ ցուցում կտա»:

Արմեն Հովհաննիսյանն էլ նշեց՝ որևէ գործ չի եղել, որ ԱԱԾ-ն հաջողի համակողմանի քննել. «Ի՞նչը ինձ պետք է ստիպի հավատալ, որ նրանք այս գործում կհաջողեն և նոր՝ սպիտակ էջից կսկսեն»:

Քաղաքագետը ընդգծեց՝ այդ գործը միանշանակ պետք է բացվի, որովհետև դա Երրորդ հանրապետության ճակատագրական իրադարձություններից մեկն է և առավել, քան Մարտի 1-ը. «Բայց ես այդքան լավատեսորեն չեմ տրամադրված, որ այսօր իշխանությունը՝ իր ԱԱԾ-ով, քննչական մարմիններով, դատախազությամբ, ի վիճակի է օբյեկտիվ, համապարփակ, խորը քննություն իրականացնելու»:

Հոկտեմբերի 27-ի գործի բացահայտման հետ կապված Սարո Սարոյանը նախ ընդգծեց անցած 20 տարիներին քաղաքական կամքի բացակայությունը. «Այդ կամքը ընդհանրապես չի եղել կամ ուրիշ կամք է եղել: Կա նաև պրոֆեսիոնալիզմի խնդիր. հիմա կարող է քաղաքական կամք լինի, բայց ես վստահ եմ՝ մեր ինստիտուտները չեն կարողանա լիարժեք բացահայտել այդ գործը: Մեզ պետք է կայացնել ինստիտուտները. այսօր պետական կառավարման մեջ ամենահետ ընկած օղակը Ազգային անվտանգության ծառայությունն է»:

Ի հավելումն՝ Արմեն Հովհաննիսյանն էլ ասաց. «Իսկ եթե պարզվի, որ կա արտաքին հետք, արդյոք կլինի՞ քաղաքական կամք՝ հաշվի առնելով այն, որ կառավարությունը շատ միանշանակ հայտարարել է իր արտաքին քաղաքական կողմնորոշման մասին: Ես ցավով եմ ասում, որ այստեղ ունեմ կասկածներ: Ցավում եմ, որ թեև արդեն 2019 թվականն է, սակայն մենք դեռ ի վիճակի չենք այդ կարևոր պատմական թնջուկներին ազատ կերպով լուծում տալ»:

 

Հարցազրույցն ամբողջությամբ՝ տեսանյութում:

  • Դիտումներ՝ *