ԱՄՆ Կոնգրեսի ներկայացուցիչների պալատում քվեարկության կդրվի Հայոց ցեղասպանության ճանաչման բանաձևը: Թեմայի շուրջ զրուցելու համար «Առաջին լրատվական»-ը հյուրընկալել է քաղաքագետ Նարեկ Մինասյանին և ԱԺ «Իմ քայլը» խմբակցության պատգամավոր Վիկտոր Ենգիբարյանին:
«Շատ է շրջանառվում, որ այս բանաձևերն ունեն պատմական բնույթ, բայց կարծում եմ՝ տվյալ խնդրի հետ կապված պատմականությունը մի փոքր գերագնահատված է»,- նշեց Նարեկ Մինասյանը՝ հիշեցնելով, որ նախկինում ևս նմանատիպ բանաձևեր ընդունվել են:
Նրա խոսքով՝ այս բանաձևը նախ չունի օրենքի ուժ, անգամ Սենատ չի ուղարկվում և չի ուղարկվում նաև նախագահի ստորագրության: «Իհարկե, ոգեկոչման առումով սա կարևոր քայլ է, իր մեջ պարունակում է քաղաքական մեսիջ, իրավական առումով, սակայն, շատ լուրջ հետևանքներ չի կարող ունենալ»:
Ինչպես նշեց մեր զրուցակիցը, այս բանաձևի համար հաշվի է առնվել նաև միջազգային կոնյունկտուրան. «Պատահական չէ, որ Սիրիա թուրքական ներխուժմանը զուգընթաց ակտիվացավ նաև այս թեման: Այնուամենայնիվ, այս դիսկուրսի առաջացումը նշանակում էր, որ նույն Միացյալ Նահանգներում տվյալ խնդրին ուշադրություն է դարձվում և դիտարկվում է, որ հարմար ժամանակահատված է խնդիրն առաջ տանելու համար: Հատկանշական է նաև այն հանգամանքը, որ այս բանաձևը ստացել է թե՛ դեմոկրատների, թե՛ հանրապետականների աջակցությունը»:
Վիկտոր Ենգիբարյանն էլ նկատեց, որ այս բանաձևն ունի քաղաքական մեծ նշանակություն. «Ի վերջո՝ մենք ինչո՞ւ ենք ամբողջ աշխարհին կոչ անում ճանաչել Հայոց ցեղասպանությունը: Մեր կարևորագույն խնդիրն այն է, որ դա ունենա կանխարգելիչ նշանակություն: Սա կարևոր է նաև գիտական, հանրային քաղաքական դիսկուրսի համար»:
Հարցազրույցն ամբողջությամբ՝ տեսանյութում: