Այսօր Արդարադատության նախարար Ռուստամ Բադասյանը մասնակցում է «Իրական սեփականատերերի թափանցիկություն» աշխատաժողովին: Լրագրողների հետ զրույցում Բադասյանն անդրադարձավ Նաիրի Հունանյանի՝ վաղաժամկետ ազատման դիմումին և պրոբացիայի բացասական պատասխանին.«Հայտնի են չափանիշները, որոնք սահմանված են օրենսդրությամբ, ինչի հիման վրա գնահատում են, որպեսզի պատասխան տան: Գնահատել են իրենց գործառույթների շրջանակում ու տվել են բացասական պատասխան, ինչը նշանակում է՝ չենք հասնի դատական քննության փուլին: Տարածել ենք հաղորդագրություն, կա բողոքարկելու սահմանված ժամկետ: Այս փուլում ԱՆ-ին ենթակա մարմինների ոլորտից այլևս դուրս է»: Հարցին՝ պատգամավոր Արման Բաբաջանյանի հայտարարությունից հետո չի՞ ցանկանում հանդիպել Նաիրի Հունանյանի հետ, Բադասյանը նշեց՝ ոչ.«Ցանկություն չունեմ հանդիպելու»: Լրագրողի այն հարցին՝ չի՞ կարծում, որ Նաիրի Հունանյանը կարող է արժեքավոր տեղեկություններ հայտնել, նախարարը պատասխանեց.«Եթե արժեքավոր տեղեկություններ կարող է հայտնել, դա պետք է հետաքրքրի իրավական մարմիններին, ոչ թե՝ ինձ»: Ռուստամ Բադասյանը նշեց, որ Նաիրի Հունանյանի եղբորը՝ Կարեն Հունանյանին նույնպես չի հանդպել: