Հայաստանում քննադատության է արժանացել Հայաստանի արտգործնախարար Զոհրաբ Մնացականյանի հարցազրույցը BBC հեռուստաընկերության «Ծանր զրույց» հաղորդաշարին: Նույնիսկ ձևավորվել է որոշակի կոնսենսուս. արտգործնախարարին մեղադրում են թե՛ նախկինները և թե՛ մարդիկ, ովքեր հեղափոխության կողմնակիցներ են: Ասել, թե Մնացականյանն ընդհանրապես չէր տվել դրա առիթը, թերևս սխալ կլինի: Շատերը կարծում են, որ կային հարցեր, որտեղ Հայաստանի արտգործնախարարը պետք է տար առավել համարձակ և հստակ գնահատական ու պատասխաններ՝ որևէ շահարկման տեղիք չտալով:
Թեմայի շուրջ «Առաջին լրատվական»-ի հետ քննարկմանը մասնակցեցին Երևանի մամուլի ակումբի նախագահ Բորիս Նավասարդյանը, քաղաքագետ Արմեն Վադանյանը և վերլուծաբան Գոռ Մադոյանը:
Բորիս Նավասարդյանի դիտարկմամբ՝ նախկին իշխանություններն առիթը բաց չթողեցին Զոհրաբ Մնացականյանի և նոր իշխանությունների վրա հարձակվելու համար: «Նաև լայն փորձագիտական շրջանակներ կան, որոնք նույնպես առիթը բաց չեն թողնում՝ ցույց տալու, որ իրենք ավելի խելացի են և շատ ավելի լավ կարող են պաշտպանել ազգային շահը, քան գործող պաշտոնյաները»,- նշեց Բ. Նավասարդյանը: Նա նաև հավելեց, որ իր կարծիքով բոլորը չէ, որ քննադատում են արտգործնախարարին այս հարցազրույցի համար, պատգամավորներից շատերն այն բարձր են գնահատել: «Մնացականյանի հարցազրույցի մեկնաբանությունների դրամատիզմը ավելի շատ էր, քան պետք էր: Կարելի էր ավելի համեստ արձագանքով բավարարվել»,- նշեց Բ. Նավասարդյանը՝ հավելելով, որ համամիտ է՝ քննադատության համար որոշակի առիթներ տրված էին:
Գոռ Մադոյանի դիտարկմամբ՝ հնչեցին հարցեր, որոնց նախարարը պատրաստ չէր պատասախանել: «Պետք է համալիր կերպով պատրաստված լիներ նույնիսկ ամենածայրահեղ հարցերին: Բայց չհաշված այդ մեկ-երկու հարցերը, ընդհանուր տպավորությունը դրական էր»,- նշեց վերլուծաբանը:
Արմեն Վարդանյանն ընդգծեց, որ Զոհրաբ Մնացականյանը հարցազրույցում մի քանի անհաջող ձևակերպումներ տվեց. «Օրինակ՝ լրագրողի հարցին, թե Արցախն ադրբեջանակա՞ն տարածք է, արտգործնախարարը պետք է պատասխաներ, որ դա մեր պատմական հայրենիքն է, որտեղ հայերն ապրում են անհիշելի ժամանակներից, սակայն Մնացականյանը նշեց, որ Արցախը մի տարածք է, որտեղ ապրում են հայեր…»:
Մանրամասն՝ տեսանյութում: