«Ցանկացած հայազգի անձնավորություն, որը ստիպված լքել է իր բնակավայրը, պետք է իրավունք ունենա վերադառնալու այնտեղ: Բարեբախտաբար, Ռաս ալ-Աին քաղաքում կա՛մ հայ չկա, կա՛մ շատ սակավաթիվ են»,- «Առաջին լրատվական»-ի հետ զրույցում ասաց Սփյուռքի հարցերով գլխավոր հանձնակատար Զարեհ Սինանյանը՝ վտանգավոր համարելով նաև վերադարձը Ռաս ալ-Աին, քանի որ այն գտնվում է թուրքական վերահսկողության ներքո:
Մեր զրուցակցի խոսքով՝ հայերի կարգավիճակը իհարկե շատ տարբեր է քրդերից. «Դա շատ կարևոր է, և միշտ պետք է հիշեցնենք մեր հայրենակիցներին, որ նրանք ունեն հանգրվան, հայրենիք, և Հայաստանը ամենավատ պայմաններում նույնիսկ պատրաստ է իրենց ընդունելու»:
Զարեհ Սինանյանը հավաստիացրեց, որ երբ Սիրիայի հյուսիսային տարածքներում սկսվեց թուրքերի լայնածավալ հարձակումը, հայկական կողմը՝ և՛ իրենց գրասենյակը, և՛ ԱԱԽ-ն, և՛ Սիրիայում ՀՀ գլխավոր հյուպատոս Արմեն Սարգսյանը լծված էին աշխատանքի և պատրաստվում էին իրադարձությունների ցանկացած վատ սցենարի:
Ինչ վերաբերում է Լիբանանում տեղի ունեցող դեպքերին, մեր զրուցակիցը նշեց. «Իհարկե, պետությունը շահագրգռված է, որ հայերը, Լիբանանից հեռանալու դեպքում, հայրենադարձվեն, որովհետև մենք արդեն հայտարարել ենք, որ հայրենադարձման, հայահավաքման գործընթաց ենք սկսում, և 2050 թվականի տեսլականով մենք պետք է այստեղ ունենանք 5 մլն բնակչություն, չնայած այդ մեծ հայրենադարձությանը մենք դեռ պատրաստ չենք, օրինակ՝ Ազգային ժողովը դեռ չի ընդունել Վերադարձի մասին օրենքը, մենք դեռ չենք վերանայել մեր հարկային քաղաքականությունը, դեռ չենք ստեղծել այն սոցիալական ծրագրերի փաթեթը, որն անհրաժեշտ է լինելու տասնյակ հազարավոր հայերի ընդունելու համար: Սակայն դա էական չէ, և մենք արագ ռեժիմով պետք է կարողանանք արձագանքել այս իրավիճակներին և ստեղծել նախապայմաններ մարդկանց վերադարձի համար»:
Հարցազրույցն ամբողջությամբ՝ տեսանյութում:
