«Առաջին լրատվական»-ի զրուցակիցն է քաղաքագետ, ՌԱՀՀԿ ղեկավար Մանվել Սարգսյանը:
-Ներքաղաքական իրադարձությունների ֆոնին կարծես թե ստվերում մնացին Հայաստանից դուրս տեղի ունեցող իրադարձությունները՝ մասնավորապես՝ ի՞նչ էր Սիրիայում կատարվածը, այդ մասին քիչ է խոսվում կամ ոչ հիմնավոր: Մենք այդտեղ ինչպիսի՞ շահեր ունենք հետապնդելու:
-Կարծում եմ՝ միջազգային հարաբերություններում նոր փուլ է սկսվել՝ անմիջականորեն կապված ԱՄՆ-ի վարած քաղաքականության հետ, որովհետև Միացյալ Նահանգները գնացին այդ քայլին, բայց հետո բացահայտվեցին ուրիշ փաստեր. ԱՄՆ-ի և Թուրքիայի միջև այդ օպերացիան սկսելու շուրջ համաձայնություն 20 տարի առաջ է եղել, որ Թուրքիան կարող է գնալ ինչ-ինչ գործողությունների, այդ ամենը հետո պարզվեց, բայց էականը ԱՄՆ այս քայլն էր, թե ինչու որոշվեց նման կոշտ հայտարարություններ անել:
-Այսինքն՝ կոմբինացիան բազմաբևեռ էր:
-Այո՛, դա շատ մեծ խնդիր է. հարյուր-հազարավոր մարդիկ են տեղաշարժվել՝ իրենց տները թողել-գնացել, նման մասշտաբների զորքեր են հանվել, այս ամենը ռեգիոնալ խնդիր չէ: Էլի ենք տեսել, որ հանգիստ, առանց աղմուկի, Թուրքիան, ԱՄՆ-ի հետ համաձայնեցված, մտել է և դուրս մղել ժողովրդին, բայց այս անգամ այս մեծ աղմուկը, որ բխում է ԱՄՆ նախագահի գնահատականներից, ցույց է տալիս, որ նպատակը շատ ավելին է, քան ռեգիոնում տեղաշարժերը:
-Էրդողանի՞ նպատակներն են ավելի մեծ:
-Ո՛չ, ԱՄՆ-ի: Էրդողանի նպատակները կոնկրետ են, նա հստակեցրել է դիրքորոշումը՝ ուզում է քրդերին հեռացնել և այդ տարածքներում թուրքոմաններին և սիրիացիներին տեղավորել: Թուրքիայի նախագահը նաև հայտարարել է, որ եթե Ռուսաստանը պայմանավորվածությունները չիրականացնի, նորից նույնը կանեն՝ ավելի մեծ թափով:
-Մեծ հաշվով, թուրքերն ունեն նաև Ռուսաստանի՞ համաձայնությունը:
-Իհարկե ունեն: Շատերի կարծիքով՝ Ռուսաստանը կարողացավ այսպիսի իրավիճակ ստեղծել, որ ԱՄՆ-ը հասկանա, որ պետք է հեռանա, բայց կարծում եմ՝ դա շատ պարզունակ գնահատական է: Ամեն ինչը պարզ ու հստակ ԱՄՆ-ի կողմից կազմակերպված մի բան է: Շատերն էին խոսում այն մասին, որ դա ծուղակի նման մի բան է՝ բերել, մի նեղ տարածքում հավաքել Թուրքիա, Սիրիա, քրդեր, Ռուսաստան. սա վտանգավոր թակարդ է: Էրդողանը հանգիստ գնաց, և ի՞նչ եղավ, ուղղակի ստատուս քվո ճանաչեցին՝ ինչ կա, ճանաչենք, կանգ առնենք, քրդերը թող հեռանան: Սա է տեղի ունեցել… Թվում էր, թե հանգստություն է մտնում, և բոլորը պետք է լռեն, բայց ուրիշ բան տեսանք…
Հարցազրույցն ամբողջությամբ՝ տեսանյութում: