Եգիպտոսի Սահարա անապատում շահագործման է հանձնվել Benban արևային պարկը: Դրա հզորությունը 1.5 ԳՎտ-ից ավելի է, ինչն այն դարձնում է խոշորագույնն աշխարհում: Այս տեղեկատվությունը հրապարակել է Վերակառուցման և զարգացման եվրոպական բանկը (ՎԶԵԲ)՝ YouTube-ում տեղադրելով արևային էլեկտրակայանի մասին տեսանյութը:
Նշվում է, որ պարկը պարունակում է վեց միլիոն ֆոտովոլտային վահանակ:
Այս նախագիծն իրականացնելու համար պահանջվել է երեք տարի: ՎԶԵԲ-ը ֆինանսավորել է էլեկտրակայանի 32 հատվածներից 16-ի ստեղծումը:
Արևային էլեկտրակայանը կառուցվել է Օուսա քաղաքի մերձակայքում և զբաղեցնում է Սահարայի անապատի 37 քկմ տարածքը: 1.5 ԳՎտ հզորության շնորհիվ պարկը կարողանում է էլեկտրաէներգիա ապահովել ավելի քան մեկ միլիոն բնակելի շենքերի համար:
Ավելին, ապագայում արևային պարկը նախատեսվում է հասցնել 1.8 ԳՎտ հզորության:
Նախկինում աշխարհի ամենամեծ արևային էլեկտրակայանը Չինաստանի Tenger Desert Park-ն էր՝ 1.54 ԳՎտ հզորությամբ:
Շնորհիվ էկոլոգիապես մաքուր նոր արևային էլեկտրակայանի՝ Եգիպտոսը կկարողանա կանխել տարեկան 1.9 միլիոն տոննա CO2-ի մթնոլորտ արտանետումները: Միևնույն ժամանակ, մինչև 2020 թ.-ը երկիրը նախատեսում է էներգիայի 20 %-ը ստանալ վերականգնվող աղբյուրներից:
