Թուրքիայի նախագահ Ռեջեփ Թայիփ Էրդողանը դիմել է Անկարայի դատախազին` ֆրանսիական Le Point ամսագրի «վիրավորական» շապիկի պատճառով:
Թուրքական Anadolu գործակալությունը հայտնում է, որ Էրդողանի փաստաբանը հանդես է եկել հայտարարությամբ՝ պահանջելով քրեական գործ հարուցել:
Ամսագրի շապիկին, որը թվագրված է հոկտեմբերի 24, պատկերված է պատիվ բռնած Էրդողանը և գրված է՝ «L’éradicateur» («կործանողը» կամ «ոչնչացնողը»): Էրդողանի մասին հրապարակման մեջ ասվում է, որ նա «էթնիկ զտումներ» է իրականացրել Սիրիայի քրդերի դեմ:
Էրդողանի փաստաբանը կարծում է, որ ամսագիրը խախտել է Թուրքիայի քրեական օրենսգրքի «Նախագահին վիրավորելու մասին» հոդվածը՝ հայտնում է Habertürk հեռուստաալիքը: Պատասխանատուները, ըստ փաստաբանի, գլխավոր խմբագիր Էթյեն Ժերնելն ու լրագրող Ռոման Հուբերն են, որոնք ամսագրում հոդված են հրապարակել Էրդողանի մասին:
Le Point-ի խմբագրության տարածած հայտարարության մեջ Էրդողանի գործողությունները ազատ երկրներում գրաքննություն պարտադրելու փորձ է որակվել:
https://twitter.com/LePoint/status/1187055125501829123