Եվրախորհրդարանը «Մտքի ազատության համար» Սախարովի մրցանակը շնորհել է ույգուրցի տնտեսագետ Իլհամ Թոհթին, որը Չինաստանում ցմահ ազատազրկման է դատապարտվել՝ սեպարատիզմի հոդվածով:
Ըստ Եվրախորհրդարանի կայքի, ԵԽ ղեկավարները հաղթողին ընտրել են հոկտեմբերի 24-ին: «Հանձնելով այս մրցանակը, մենք կոչ ենք անում Չինաստանի կառավարությանը ազատել Թոհթին և հորդորում ենք հարգել Չինաստանում փոքրամասնությունների իրավունքները»,- ասել է Եվրախորհրդարանի նախագահ Դավիդ Սասոլին: Նշվում է, որ Թոհթին Չինաստանում ազգային փոքրամասնություններին ինքնավարության շնորհման և երկխոսության կողմնակից է: 2014-ին նա դատապարտվել է ցմահ բանտարկության՝ անջատողականության մեղադրանքով: Ույգուրները թյուրքախոս մուսուլման ժողովուրդ են, որոնք բնակվում են Չինաստանի հեռավոր արևմուտքում գտնվող Սինցզյան կոչվող շրջանում: ԵԽ-ն պնդում է, որ 2017 թվականից ի վեր Չինաստանի կառավարությունը հատուկ ճամբարներում է պահում ույգուրական էթնիկ խմբի ավելի քան մեկ միլիոն ներկայացուցչի: