Աշխարհի ուժեղագույն ֆուտբոլային ակումբների հաշվարկում «Բարսելոնան» պահպանում է առաջատարի դիրքը: Clubworldranking-ի վարկածով՝ իսպանական ակումբն ունի 15196 միավոր: Նախորդ ամսվա համեմատ իսպանական թիմի միավորներն ավելացել է 297-ով: «Բարսելոնան» շարունակում է զգալիորեն գերազանցել երկրորդ տեղում գտնվող արգենտինական «Ռիվեր Փլեյթին»: Վերջինս ունի 13070 միավոր: Երրորդ հորիզոնականում անգլիական «Լիվերպուլն» է, իսկ 4-րդը՝ «Մանչեսթեր Սիթին»: Լավագույն հնգյակը եզրափակում է իսպանական մեկ այլ ակումբ՝ «Վալենսիան»: 6-րդ հորիզոնականում Մադրիդի «Ռեալն» է, որին հաջորդում են արգենտինական «Բոկա Խունիորսը», բրազիլական «Պալմերյասը», «Ատլետիկոն» և Լոնդոնի «Չելսին»:
Իտալական «Ռոման», որտեղ ելույթ է ունենում Հայաստանի ազգային հավաքականի ավագ Հենրիխ Մխիթարյանը, վարկանիշային աղյուսակի 39-րդ հորիզոնականում է: Սեպտեմբերի հրապարակման համեմատ Հռոմի թիմն առաջադիմել է 6 հորիզոնականով:
ԽՍՀՄ երկրներից լավագույն 100 ակումբների շարքում ներկայացուցիչներ ունեն միայն Ռուսաստանը և Ուկրաինան: Մասնավորապես, Դոնեցկի «Շախտյորը» 73-րդն է, Կիևի «Դինամոն»՝ 89-րդը, Սանկտ Պետերբուրգի «Զենիթը» 61-րդն է, «Կրասնոդարը»՝ 67-րդը, Մոսկվայի «Լոկոմոտիվը»՝ 50-րդը:
Clubworldranking-ը ակումբների միավորները հաշվարկելիս հաշվի է առնում վերջին 52 շաբաթվա ընթացքում տեղի ունեցած հանդիպումների արդյունքները ըստ մրցաշարերի կարևորության:
Աշխարհի 1000 լավագույն ակումբների շարքում Հայաստանն ունի 3 ներկայացուցիչ: Մեր չեմպիոնը՝ «Արարատ-Արմենիան», եվրագավաթների ընթացիկ խաղարկությունում բավական հաջող ելույթների շնորհիվ հայտնվեց վարկանիշային աղյուսակում: Երևանյան թիմն այս պահին 781-րդ հորիզոնականում է: Նախորդ ամիս ՀՀ գործող չեմպիոնը 765-րդն էր:
Հիշեցնենք, որ «Արարատ-Արմենիան», առաջին անգամ մասնակցելով եվրագավաթների մրցաշարերին, դուրս եկավ Եվրոպա լիգայի փլեյ-օֆ և միայն 11 մետրանոց հարվածաշարում զիջեց Լյուքսեմբուրգի չեմպիոն «Դյուդելանժին»: Դասակարգման աղյուսակում հայկական թիմերից ամենաբարձր դիրքում ՀՀ փոխչեմպիոն Երևանի «Փյունիկն» է: Վերջինիս այս տարի ևս հաջողվեց դուրս գալ Եվրոպա լիգայի որակավորման երրորդ փուլ՝ պայքարից դուրս թողնելով մակեդոնական «Շկուպիին» և չեխական «Յաբլոնեցին»:
Հիշեցնենք, որ անցյալ տարի էլ «Փյունիկը» բավական հաջող ելույթ ունեցավ Եվրոպա լիգայի խաղարկությունում: Մասնավորապես, երևանյան թիմը Եվրոպա լիգայի առաջին փուլում պայքարից դուրս թողեց Մակեդոնիայի «Վարդարին», իսկ երկրորդ փուլում՝ ղազախական «Տոբոլին»: Որակավորման երրորդ փուլում «Փյունիկը» լարված պայքարում զիջեց Իսրայելի «Մաքաբիին»: Այս պահին «Փյունիկը» 468 միավորով 767-րդ հորիզոնականում է: Նախորդ ամսվա համեմատ «Փյունիկը» նահանջել է 15 հորիզոնականով:
ՀՀ փոխչեմպիոնին 41 հորիզոնականով զիջում է գավաթակիր «Ալաշկերտը»: Վերջինս այս տարի հաղթահարեց Եվրոպա լիգայի առաջին փուլի արգելքը՝ պայքարից դուրս թողնելով «Մակեդոնիային»: Երևանում մեր թիմը հաղթել էր 3:1, իսկ մրցակցի հարկի տակ՝ 3:0 հաշվով: Երկրորդ փուլում էլ երևանյան թիմը մոտ էր ռումինական հեղինակավոր «Ստյաուայի» արգելքը հաղթահարելուն: Սեփական հարկի տակ 0:3 հաշվով պարտվելուց հետո «Ալաշկերտը» հյուրընկալվելիս հաղթել էր 3:2 հաշվով: Ընդ որում, առաջին կեսից հետո հաղթում էինք 3:1 հաշվով, և թվում էր, թե «Ալաշկերտի» ֆուտբոլիստները նաև 4-րդ գնդակը կխփեն 10 ֆուտբոլիստներով մնացած մրցակցի դարպասը:
Ամիսներ առաջ լավագույն 1000 ակումբների շարքում էր նաև հայկական մեկ այլ ակումբ՝ «Գանձասար-Կապանը»: Վերջինս այս շրջանում անհաջող ելույթների պատճառով, սակայն, դուրս է մնացել վարկանիշային աղյուսակից:
Հարևան երկրներից Ադրբեջանը լավագույն 1000-ի մեջ ունի ընդամենը 2 ակումբ. «Ղարաբաղը» գտնվում է 546-րդ, «Նեֆթչին»՝ 678-րդ հորիզոնականում: Վրաստանը լավագույն 1000 ակումբների շարքում ունի 3 ներկայացուցիչ: Թբիլիսիի «Դինամոն» այս պահին 742-րդն է, իսկ «Չիխրուան»՝ 883-րդը: Եվրոպա լիգայի խաղարկության երրորդ փուլում «Արարատ-Արմենիայի» զիջած Վրաստանի չեմպիոն «Սաբուրթալոն» 874-րդն է: Թուրքիան վարկանիշային աղյուսակում ունի 38, իսկ Իրանը՝ 17 թիմ:
Clubworldranking-ը հաշվարկում է նաև մարզիչների վարկանիշը: Առաջին հորիզոնականում «Բարսելոնայի» գլխավոր մարզիչ Էռնեստո Վալվերդեն է: Երկրորդ հորիզոնականում է «Ռիվեր Փլեյթի» գլխավոր մարզիչ Մարսելո Գալարդոն, իսկ լավագույն եռյակը եզրափակում է «Լիվերպուլի» գլխավոր մարզիչ Յուրգեն Կլոպը: «Մանչեսթեր Սիթիի» գլխավոր մարզիչ Խոսեպ Գվարդիոլան գտնվում է չորրորդ հորիզոնականում, իսկ 5-րդը բրազիլական «Ատլետիկոյի» գլխավոր մարզիչ Տիագո Նունյեսն է: Թուրինի «Յուվենտուսի» գլխավոր մարզիչ Մաուրիսիո Սարին 6-րդն է: Վերջինիս հաջորդում են «Վալենսիայի» գլխավոր մարզիչ Մարսելինյոն, ««Բոկա Խունյորսի» գլխավոր մարզիչ Ալֆրեդոն, «Արսենալի» գլխավոր մարզիչ Ունայ Էմերին և Մադրիդի «Ատլետիկոյի» գլխավոր մարզիչ Դիեգո Սիմեոնեն:
Լավագույն 1000 մարզիչների շարքում տեղ են գտել 3 հայ մասնագետներ: Ֆրանսիական «Մոնպելյեի» հայազգի գլխավոր մարզիչ Միշել Տեր-Զաքարյանը 214-րդն է: «Արարատ-Արմենիայի» գլխավոր մարզիչ Վարդան Մինասյանը՝ 893-րդն է, իսկ «Ալաշկերտի» արդեն նախկին գլխավոր մարզիչ Աբրահամ Խաշմանյանը՝ 934-րդը:
