Ղազախստանը նավթի արտահանման նոր հնարավորություններ է փնտրում: Դրանք, ինչպես գրում են ղազախական լրատվամիջոցները, անհրաժեշտ կլինեն Աստանային, երբ Արևմուտքի՝ ՌԴ-ին ուղղված պատժամիջոցներն ինչ-որ կերպ անդրադառնան ղազախական նավթի արտահանման ներկայիս ուղիների վրա:
Ղազախստանի իշխանությունն այս ճանապարհին հիմնական գործընկեր է տեսնում Ադրբեջանին: Ապագայում խնդիրների դեպքում Ղազախստանը նավթը համաշխարհային շուկա է առաքելու Ադրբեջանի միջոցով: Ու չի բացառվում, որ ղազախա-ադրբեջանական խորացող քաղաքական և տնտեսական հարաբերությունները Հայաստանի ՄՄ անդամակցության ճանապարհին գլխացավանք դառնան, քանի որ Ադրբեջանի «խնդրանքով» գուցե Ղազախստանը խոչընդոտներ հարուցի ՄՄ անդամակցության ճանապարհին՝ բարձրացնելով Ղարաբաղի հարցը, որն էլ ըստ էության հուզում է Ադրբեջանին:
«Առաջին լրատվական»-ի հետ զրույցում Ղազախստանի ներդրումների շահութաբերության հետազոտության գործակալության ավագ փորձագետ, քաղաքական և տնտեսական վերլուծաբան Էռլեն Բադիխանը նշեց, որ Ղազախստանը ձգտում է իր և՛ մոտ, և՛ հեռու բոլոր գործընկերների հետ հավասար առևտրատնտեսական հարաբերությունների կառուցմանը, ձգտում է խուսափել այնպիսի իրավիճակներից, որոնց արդյունքում կարող է վնասել այդ հարաբերությունները: «Ուստի եթե նույնիսկ Ադրբեջանը հանդես գա նման առաջարկությամբ, ապա, իմ կարծիքով, դա կլինի պաշտոնական հայտարարություն, իսկ կհնչի որպես անձնական խնդրանք: Բայց իրադարձությունների նման զարգացումը շատ քիչ հավանական է: Կարծում եմ, որ Ղազախստանը այսրոպեական տնտեսական օգուտի համար չի գնա մի գործընկերոջ հետ հարաբերությունների վատթարացման՝ մեկ ուրիշ գործընկերոջ խնդրանքով»,- նշեց նա:
Այնինչ «Առաջին լրատվական»-ի հետ զրույցում Բաքվի քաղաքական ինովացիաների և տեխնոլոգիաների կենտրոնի տնօրեն, ադրբեջանցի քաղաքական վերլուծաբան Մուբարիզ Ահմեդօղլուն ասաց, որ Հայաստանն ազատ է միանալու ցանկացած միությանը, սակայն Ադրբեջանը դեմ է, եթե Հայաստանը պետք է ՄՄ-ին միանա Ղարաբաղի հետ միասին: Նա նշեց, որ իրենք ցանկանում են, որ ՄՄ անդամ երկրները հարգեն Ադրբեջանին՝ առաջին հերթին պահանջելով, որպեսզի ՀՀ-ն լուծի ԼՂ հակամարտությունը:
«Ռուսաստանը ստիպված կլինի հստակեցնել այդ հարցը: Ես չեմ կարծում, որ Ռուսաստանի համար Հայաստանն այնքան կարևոր է, որ ամեն գնով այդ հարցը շրջանցվի: Հարցականի տակ է դրվում ՄՄ գոյությունը, քանի որ Ռուսաստանի կողմից ԼՂ հարցի չհստակեցումը կարող է առիթ հանդիսանալ, որպեսզի Բելառուսն ու Ղազախստանը դուրս գան ՄՄ-ից: Ռուսաստանը չի համարձակվի և թույլ չի տա, որ այս հարցի շուրջ լարվածություն առաջանա, և խաղաղ եղանակով կլուծի ԼՂ հարցը: Իսկ Հայաստանը հնարավորություն չունի Ռուսաստանի առաջարկներից հրաժարվելու: Չէ՞ որ Հայաստանը Ասոցացման համաձայնագրի նախաստորագրման շեմին էր, երբ Պուտինը հրավիրեց Սերժ Սարգսյանին Մոսկվա, հրամայեց միանալ ՄՄ-ին, և նա համաձայնեց, նույնիսկ տպավորություն ստեղծվեց, որ Հայաստանն է խնդրում ՄՄ մտնելու համար»,- ասաց նա՝ հավելելով, որ առաջին անգամ Ղարաբաղի հարցը ՄՄ-ում բարձրացրել է Լուկաշենկոն, ապա Նազարբաևը: Նրա խոսքով՝ չի բացառվում, որ Նազարբաևն իր կամքով բարձրացնի այդ հարցը առաջիկայում ՄՄ-ում, բայց Ադրբեջանը հրապարակային դա չի խնդրի կամ պահանջի:
