Հոկտեմբերի 27-ի ահաբեկչական խմբի ղեկավար Նաիրի Հունանյանի դիմումը քրեակատարողական հիմնարկին իրեն վաղաժամկետ ազատ արձակելու համար վրդովմունք, զայրույթ է առաջացրել ահաբեկչության զոհ դարձածների մերձավորների, տուժողների, ահաբեկչությունն ընդհանրապես դատապարտողների շրջանում։
Երեկ այդ լուրին տեղեկանալուց հետո, հընթացս այդ վրդովմունքին, նաև վարկածներ առաջ քաշվեցին, որ Նաիրի Հունանյանն այդ կերպ մեսիջ է հղում որոշակի շրջանակների։
Փաստաբան, «Հանրապետություն» կուսակցության քաղխորհրդի անդամ Նորիկ Եղիազարյանը նկատում է, որ Նաիրի Հունանյանն ընդամենն օգտվել է իր օրենսդրական իրավունքից, համաձայն որի՝ ցմահ ազատազրկվածները պատժի ժամկետի քսան տարին լրանալուց հետո իրավունք ունեն դիմելու ներման խնդրանքով։
«Այսինքն՝ կա ցմահ ազատազրկման երկու տեսակ՝ առանց ներման իրավունքի և ներման իրավունքով։ Ժամանակին, երբ այդ հարցը քննարկվում էր, հաղթեց այն տեսակետը, որ մնա ներման իրավունքով ազատազրկման տեսակը, որպեսզի մարդկանց հնարավորություն տրվի հայցել ներում քսան տարի հետո։ Ինչ վերաբերում է Նաիրի Հունանյանին, ապա չեմ կարծում, թե նրա խնդրանքը կբավարարվի»,- ասաց Նորիկ Եղիազարյանը։
Անդրադառնալով Նաիրի Հունանյանի կողմից հղված մեսիջին՝ Նորիկ Եղիազարյանն արձագանքում է․ «Հիմա եթե քսան տարին չլրանար, նա չէր կարող դիմել, ոչ մի մեսիջ էլ չէր լինի։ Հիմա զուգադիպությո՞ւն է դա, թե՞ ինչ է, բայց ոչ մի մեսիջ էլ չէր լինի»։
Նորիկ Եղիազարյանը կարծում է, որ եթե Նաիրի Հունանյանը հայտնվի ազատության մեջ, ապա նրան պետք է փախցնեն, քանի որ այն հետքերը, որոնք մնացել են հասարակության հիշողության մեջ, նրանք չեն կարող հանգիստ մնալ։ Եթե բավարարվի նրա դիմումը, ապա պետք է նրան հեռացնեն Հայաստանից։ Կարծում եմ, սակայն, որ այդ դիմումը չի բավարարվի։
Հարցին, թե հնարավո՞ր է, որ այսուհետև Հոկտեմբերի 27-ի ահաբեկիչները խոսեն, ասեն, թե ով է իրենց ուղղորդել, Նորիկ Եղիազարյանը պատասխանեց․ «Իսկ Դուք կարծում եք, թե իրենք գիտե՞ն, թե ով է ուղղորդել։ Ես կարծում եմ, որ իրենք էլ չգիտեն, թե ահաբեկչության արմատները որտեղ են, եթե իմանային, ապա նրանց վերացրած կլինեին»։
