Ռուսաստանի և Թուրքիայի միջև ձեռք բերված պայմանավորվածություններում կան բազմաթիվ «բաց տեղեր»: Այս պնդմամբ, ինչպես հաղորդել Է ՏԱՍՍ-ը, Կոնգրեսում հանդես Է եկել Սիրիայի հարցերով ԱՄՆ-ի հատուկ ներկայացուցիչ Ջեյմս Ջեֆրին:
Նրա կարծիքով՝ Մոսկվան «լղոզված պարտավորություններ» Է ստանձնել: Ջեֆրին պարզաբանել Է, թե տեղյակ չԷ՝ արդյոք Ռուսաստանն արդյունավետ մեթոդներ ունի համաձայնեցված շրջաններից քրդերի հեռանալուն հասնելու համար:
Այդուհանդերձ, նա նշել Է, որ Մոսկվայի և Անկարայի համաձայնությունը «Թուրքիային հետ կպահի առաջ շարժվելուց»:
Անկարան Ռուսաստանի նախագահ Վլադիմիր Պուտինի և Թուրքիայի նրա պաշտոնակից Ռեջեփ Թայիփ Էրդողանի Սոչիում կայացած հանդիպումից հետո դադարեցրել Է ռազմական գործողությունը Սիրիայում: Բանակցությունները, այդ թվում՝ դեմառդեմ, տևել են ավելի քան վեց ժամ: Կողմերի ստորագրած փոխըմբռնման հուշագրի կետերից մեկում նշվում Է, որ Սիրիայի Թել Աբյադ և Ռաս Էլ Այն սահմանամերձ քաղաքների միջև կպահպանվի անվտանգության գոտին: Ընդսմին Սիրիայի հյուսիսային տարածքները վերահսկող քրդական կազմավորումները սահմանից հետ կքաշվեն մինչեւ 32 կիլոմետր:
Հոկտեմբերի 23-ին ժամը 12:00-ից տարածաշրջան կմտցվեն ռուսական ռազմական ոստիկանությունը և սիրիացի զինծառայողներ, բայց թուրքական գործողության գոտուց դուրս: Նրանք կօժանդակեն քրդական ուժերի դուրսբերմանը: Ընդհանուր առմամբ քրդերին 150 ժամ Է տրվում Սիրիայի խորքը հեռանալու համար, այսինքն՝ մինչև հոկտեմբերի 29-ի ժամը 18:00-ն: