Հոկտեմբերի 27-ի գործով ահաբեկչական խմբավորման ղեկավար Նաիրի Հունանյանը, որը դատապարտված է ցմահ ազատազրկման և իր պատիժը կրում է «Երևան Կենտրոն» քրեակատարողական հիմնարկում, դիմել է վաղաժամկետ ազատ արձակման խնդրանքով։ Այդ մասին 24News-ին հայտնել է ՀՀ ԱՆ քրեակատարողական ծառայության հանրային կապերի բաժնի պետ Նոնա Նավիկյանը։ Ըստ նրա՝ Հունանյանը համապատասխան դիմում է ներկայացրել մոտ երկու շաբաթ առաջ, այն ընթացքի մեջ է։
ԱԺ նախկին պատգամավոր, Հայաստանի ժողովրդական կուսակցության փոխնախագահ Գրիգոր Հարությունյանը, որը Հոկտեմբերի 27-ին եղել էր ԱԺ-ի դահլիճում, մեզ հետ զրույցում կարծիք հայտնեց, որ, ըստ երևույթին, նախկին իշխանությունները խոստացել էին նրան ազատ արձակել, դրա համար է Նաիրի Հունանյանը նման քայլի դիմել։
«Իրեն երբեք չեն ազատի, նա բանտում պետք է փտի։ Նոր իշխանությունները նրան չեն ազատի։ Ինքն անասուն է, մտածելու ունակ չէ, սրիկա է, հակառակ դեպքում երկիրն այս վիճակի չէր հասցնի։ Դիմել է, կմերժվի, կմոռացվի, բացառվում է, որ նա հայտնվի ազատության մեջ»,- ասաց Գրիգոր Հարությունյանը՝ խորհուրդ տալով ընդհանրապես չտալ Նաիրի Հունանյանի անունը։
ՀՀ ներքին գործերի նախկին նախարար Սուրեն Աբրահամյանը, որը նույնպես Հոկտեմբերի 27-ին ԱԺ դահլիճում մասնակցում էր հարցուպատասխանին, արձագանքեց․ «Բացասական, ընդգծված բացասական են վերաբերում այդ քայլին։ Ոչ մեկի մտքով թող հանկարծ չանցնի նրան ազատ արձակել, դա պետք է տաբու լինի այս հասարակության մեջ։ Ես չեմ ուզում հեռուստադիտողներին, ռադիոլսողներին, ընթերցողներին վիրավորել և կոպիտ խոսքեր ասել։ Միանշանակ պետք է մերժել, և վերջ»։