Հասարակական կարծիքի ուսումնասիրման համառուսական կենտրոնի փորձագետները Քաղաքական կոնյունկտուրայի կենտրոնի հետ համատեղ պարզել են, թե կինոհերոսներից ում են ռուսաստանցիները երկրի նախագահի արժանի թեկնածու համարում:
Հետազոտության համաձայն՝ ռուսաստանցիների 20%-ը քվեարկել են հօգուտ Շտիրլիցի՝ «Գարնան 17 ակնթարթները» ֆիլմից: Նրանց կարծիքով այս հերոսն ամենից լավն է օժտված քաղաքական անհրաժեշտ որակներով: Երկրորդ տեղում պրոֆեսոր Պրեոբրաժենսկին է, որը էկրաններին հայտնվեց «Շան սիրտը» ֆիլմում: Նրան իրենց ձայնն է տվել հարցվածների 12%-ը:
Լավագույն թեկնածուների ցանկում են հայտնվել նաև Դանիլա Բագրովը «Եղբայրը» ֆիլմից, Մարիա Շվեցովան «Հետաքննության գաղտնիքներ» ֆիլմից. այս հերոսներին նշել են ռուսաստանցիների 11%-ը: Հնգյակը եզրափակում է Եկատերինա Տիխոմիրովան «Մոսկվան արցունքներին չի հավատում» ֆիլմից՝ 9%-ով:
Որակների թվում, որոնցով պետք է օժտված լինի Ռուսաստանի առաջնորդը, հարցման մասնակիցները նշել են ազնվությունը (44%), գրագիտությունը (31%), ժողովրդին մոտ լինելը (26%), կազմակերպչական ունակությունները (25%) և ինտելեկտի մակարդակը (22%): .
