Սիրիայի Դեմոկրատական ուժերի (SDF) արաբա-քրդական ջոկատները հաղորդել են Սիրիայի հյուսիսում թուրքական բանակի գրոհի արդյունքում իրենց 16 զինյալների զոհվելու մասին:
Ինչպես հաղորդում է «ՌԻԱ Նովոստին», SDF-ի մամուլի ծառայության հաղորդագրության մեջ ասվում է, որ թուրքական բանակը, չնայած հայտարարված հրադադարի ռեժիմին, հարվածներ է հասցրել ջոկատների դիրքերին Ռաս էլ Այն շրջանում, ինչի հետևանքով SDF-ի 16 զինյալ է զոհվել, երեքը վիրավորվել են:
Հինգշաբթի օրը Թուրքիան և Միացյալ Նահանգները պայմանավորվել են, որ Անկարան հինգ օրով կդադարեցնի Սիրիայում իրականացվող ռազմական գործողությունը՝ սիրիական քրդական ինքնապաշտպանական ուժերին ժամանակ տալու համար 30 կիլոմետրանոց գոտին լքելու համար: Սիրիայի դեմոկրատական ուժերի (SDF) արաբա-քրդական ջոկատների հրամանատար գեներալ Մազլում Աբդին հայտարարել է, որ այդ պայմանավորվածությունը տարածվում է միայն Թել Աբյադ և Ռաս էլ-Այն քաղաքների միջև ընկած գոտու վրա, այսինքն՝ քրդերի կողմից վերահսկվող սահմանային գոտու միայն մեկ երրորդի վրա:
Սիրիայի հարցով ԱՄՆ հատուկ ներկայացուցիչ Ջեյմս Ջեֆրին հաստատել է այդ տվյալները՝ նշելով, որ մնացյալ շրջանների վերաբերյալ Թուրքիան բանակցություններ է վարում Ռուսաստանի և Սիրիայի իշխանությունների հետ:
