Yahoo-ի փոխանցմամբ, Ֆրանսիայում կայացած մամուլի ասուլիսում ռեժիսոր Ֆրենսիս Ֆորդ Կոպոլան մեկնաբանել է իր գործընկեր Մարտին Սկորսեզեի խոսքերը Marvel-ի ֆիլմերի վերաբերյալ և համաձայնել նրա հետ:
«Մարտինը ճիշտ էր, երբ ասում էր, որ Marvel-ի ֆիլմերը կինոնկարներ չեն: Ֆիլմեր դիտելով մենք ուզում ենք դրանցից ինչ-որ բան ստանալ՝ որոշակի գիտելիքներ, լուսավորություն կամ ոգեշնչում:
Ես չգիտեմ, թե ինչ կարելի է ստանալ նույն ֆիլմը կրկին ու կրկին դիտելուց: Մարտինը բարի է գտնվել՝ ասելով, որ դա կինո չէ: Նա չի ասել, որ այդ ֆիլմերը զզվելի են, իսկ ես ասում եմ, որ այդպես է»,- ասել է Ֆրենսիս Ֆորդ Կոպոլան:
Ասուլիսը, որի ժամանակ արտահայտվել է Կոպոլան, տեղի է ունեցել նրան Prix Lumiere մրցանակի շնորհման կապակցությամբ՝ կինոյի զարգացման գործում ունեցած ավանդի համար: Իր կարիերայի ընթացքում նա նկարահանել է այնպիսի ֆիլմեր, ինչպիսիք են «Կնքահայրը», «Ապոկալիպսիսն այսօր», «Խոսակցություն»:
«Փառավոր տղաներ», «Ուոլ Սթրիթի գայլը», «Նյու Յորքի ավազակախմբերը», «Իռլանդացին» ֆիլմերի ռեժիսոր Մարտին Սկորսեզեն Marvel-ի ֆիլմերի վերաբերյալ առաջին անգամ կարծիք է հայտնել հոկտեմբերի սկզբին: Այդ ժամանակ նա ասել է, որ «դա կինո չէ», և կինոկոմիքսները համեմատել է թեմատիկ այգիների հետ:
Ավելի ուշ նա վերադարձել է այս թեմային և առանձնահատուկ շեշտել, որ նման ֆիլմերն ակնհայտորեն նրա համար չեն, և դրանք կինոթատրոնները վերածում են զվարճանքների այգիների: