«Թեժ աշուն կազմակերպելու համար պետք է լինի ժողովրդական աջակցություն, ինչը բացակայում է: Այսինքն՝ գլխավոր կոմպոնենտը՝ քաղաքացիները, որոնք պատրաստ են հազարներով դուրս գալ փողոց և աջակցել այդ օրակարգին, չկան: Ուստի նրանք փորձում են աղմուկով, տարբեր գործողություններով և ագրեսիայով կոմպենսացնել այդ պակասը»,- «Առաջին լրատվական»-ի հետ զրույցում նկատեց քաղաքագետ Արմեն Հովհաննիսյանը՝ անդրադառնալով ներքաղաքական խնդիրներին:
Նրա խոսքով՝ սա չի նշանակում, թե մեր կառավարությունն անթերի է աշխատում. «Ամենևին: Պարզապես դա նշանակում է, որ իրենց առաջարկած օրակարգը անհամեմատ մի քանի կարգ ավելի ցածր է, քան այն, ինչ մենք այսօր ունենք՝ իր բոլոր թերություններով հանդերձ»:
Արմեն Հովհաննիսյանի կարծիքով՝ «պայմանական» հեղաշրջման տապալումից հետո իրենք ժամանակ կունենան հանրության համար շատ թե քիչ ընդունելի օրակարգ ձևավորելու:
Քաղաքագետ Արա Պապյանն էլ բնական է համարում, որ հեղափոխության աջակից բազմաթիվ քաղաքական ուժեր այսօր չեն աջակցում գործող իշխանությանը: «Երբ կա մեկ ընդհանուր թշնամի կամ հակառակորդ, որին պետք է տապալել, բոլորը միավորվում են, սակայն դրանից հետո շահերը, մոտեցումները տարբեր են լինում, և առաջանում են հակասություններ: Խնդիրն այն է, որ այդ պայքարը մնա օրինականության դաշտում, և ամենակարևորը՝ ամեն մի ուժ հստակ ծրագիր առաջադրի, որպեսզի ժողովուրդը կարողանա հստակ ընտրություն կատարել այդ ծրագրերի միջև»,- «Առաջին լրատվական»-ի հետ զրույցում նշեց նա:
Պապյանի խոսքով՝ ցավոք, հեղափոխությունը «դեմ»-ի շուրջն էր համախմբված, հիմա եկել է «հանուն»-ի շուրջը համախմբվելու ժամանակը. «Բնական է, որ այդ «հանուններ»-ը տարբեր կլինեն, որովհետև հաճախ ոչ միայն նպատակներն են տարբեր լինում, այլ նաև այդ նպատակներին հասնելու ճանապարհները»:
Հարցազրույցն ամբողջությամբ՝ տեսանյութում: