Թավշյա հեղափոխությունից հետո արտերկիր մեկնող և քաղաքական ապաստան հայցող ՀՀ քաղաքացիները բախվում են դժվարությունների։ Ավելին՝ Գերմանիան արտաքսում է հայերին, սպասվում է, որ եվրոպական այլ երկրներից ևս հայերին կարտաքսեն։
Պատճառը Հայաստանում տեղի ունեցած փոփոխություններն են, որոնցից հետո Հայաստանը դադարել է դասվել անապահով երկրների ցանկում, որտեղ քաղաքացիները հետապնդվում են քաղաքական, սեռական, ռասայական և այլ պատճառներով։
Երբ Միգրացիոն ծառայությունից տվյալներ խնդրեցի արտերկիր մեկնած և վերադարձած ՀՀ քաղաքացիների մասին, ինձ տրամադրեցին գյումրեցի մանկավարժ Սարգիս Գրիգորյանի տվյալները։
Հարցազրույցի նպատակն է՝ պարզել, թե ինչու է արտերկիր մեկնած և քաղաքական ապաստան ստացած հայը վերադարձել։
«Ես մեկնեցի Ֆրանսիա՝ Ստրասբուրգ, 2011 թվականին, առողջական խնդիրների պատճառով։ Մինչև 2012թ․ մեկ տարի գտնվել եմ Ստրասբուրգում, մտադրություն չունեի մշտապես ապրել այնտեղ։ Ինձ բարեկամներս հավաստիացրել էին, որ Ֆրանսիայում հնարավոր է փախստականի կարգավիճակով քաղցկեղի անվճար լիարժեք բուժում ստանալ։ Հետո այնտեղ ստացա փախստականի կարգավիճակ։ Այնտեղ գործում էր հարյուր տոկոսանոց ապահովագրություն, որը ստանալուց հետո դիմեցի բուժհաստատություն։ Այնտեղ էլ ստացա բուժումը, որից հետո վերադարձա Հայաստան»,- պատմեց մեր զրուցակիցը։
Սարգիս Գրիգորյանը չի ցանկացել ապրել արտերկրում, ասում է՝ արտերկրի մեկ տարվա կյանքը այստեղի մեկ օրվա հետ չեմ փոխի, մոտեցումների հարց է։
«Ավելի շատ գրավիչ են փորձում ներկայացնել, բայց այնտեղ գրավիչ ոչ մի բան չկա։ Հենց փախստականի կարգավիճակ ունեցողներն են փորձում դրսի կյանքը գրավիչ դարձնել։ Ես անհամբեր սպասում էի, թե երբ կավարտվի բուժումը, որ վերադառնամ»,- ասաց նա։
Հարցին, թե չէր վստահո՞ւմ Հայաստանի առողջապահական համակարգին, Սարգիս Գրիգորյանն արձագանքեց, որ ոչ թե չի վստահում, այլ իրեն սխալ բուժում էին նշանակել, ավելի շատ վիրահատական միջամտություն առաջարկեցին, ինչն իր համար կասկածելի է եղել։
Սարգիս Գրիգորյանը նկատել է, որ հիմնական արտագաղթողները հիմնականում միջին խավից են, անապահովները չեն էլ մեկնում արտերկիր։
Ի՞նչ է առաջարկում մեր զրուցակիցը․ բարելավել առողջապահական համակարգի սպասարկման որա՞կը, որպեսզի դա արտագաղթի դռներ չբացի մեր հայրենակիցների համար։
«Չեմ կարծում, թե մեր բժիշկները խնդիր ունեն։ Ես կարող եմ նույնիսկ ասել, որ շատ բարձր որակավորում ունեցող բժիշկներ ունենք։ Ուղղակի համակարգն է սխալ գործում։ Նայեք, ապահովագրական համակարգը շատ արդյունավետ է գործում։ Եթե մեր երկրում էլ արդյունավետ գործի ապահովագրական համակարգը, ապա չեմ կարծում, թե մենք թերի առողջապահական համակարգ կունենանք։
Օրինակ՝ ստոմատոլոգիայի ոլորտում մենք այնպիսի մասնագետներ ունենք, երևի Ֆրանսիայում եզակի մարդիկ հասնեն նրանց։ Մեր երկրում ուղղակի տեխնիկան է վատ զարգացած»,- նշեց մեր զրուցակիցը։